DEN HAAG—Hulanda ta keda sostene Ukraina den 2024 tambe den e guera kontra Rusia, segun gabinete.

Gabinete a reserva 2 miar euro pa duna un señal kla ku Ukraina por konta riba nosa, segun minister di Defensa Kajsa Ollongren. E suma ta prinsipalmente pa sosten militar. Banda di esaki e suma ta bai pa restorashon di e pais, buska i persigui kriminalnan di guera. E suma reserva ta menos ku e 2,5 miar euro ku a duna Ukraina den 2023. Den zomer lo duna 1,7 miar euro adishonal. Gabinete ta kumpli asina ku e promesa ku a hasi na Ukraina durante e kumbre di NAVO den zomer. E siman aki a habri e prome sentro di entrenamentu pa pilotonan F16 na Rumania. Pilotonan ukraino lo keda entrena. E sentro ta un inisiativa di Hulanda i minister Ollongren. Na Ukraina tin hopi nesesidat na munishon i mantenshon di sistemanan. Hulanda kier yuda reforsa e defensa aerea di Ukraina asina nan por defende kontra atakenan ruso. Ministernan di Defensa, Asuntunan Eksterior i koperashon di desaroyo a skirbi Tweede Kamer ku e komunidat ukraino por konta riba sosten hulandes mietras ta nesesario. E ta un señal politiko tambe pa Rusia ku gabinete ta determina pa kontinua ku e sosten na Ukraina.