E kas di kuido di Habaai a indiká na parlamento ku e kas di kuido tin mas gastu na mantenshon debí na e huma di e refineria

Habaai,– Fundashon Bírgen di Rosario, kual ta manehá e kas di hende grandi na Habaai a splika kon e mal kalidat di airu produsí dor di refineria ISLA tabata afektá e kas di kuido.

Segun informashon presentá den sala di parlamento, e kas di kuido situá na Habaai ta kuida alrededor di 630 hende grandi. Komo ku e kas di kuido mas grandi di Kòrsou ta keda pabou di refineria ISLA, por nota ku e humanan di e refineria tabata tin efekto riba e salú di e grandinan ku ta biba na Habaai. Segun un representante di fundashon Bírgen di Rosario, e industria na Schottegat tin un impakto grandi riba e salú di nos grandinan.

E efektonan ku e humanan di ISLA tin riba Habaai a keda repartí den dos kategoria. E kategoria tokante kon e huma ta afektá nos grandinan i e personal i e kategoria tokante kon e huma ta afektá e organisashon. Segun informashon den parlamento, personan ku ta biba i traha na Habaai, tin problema pa hala rosea, tin problema ku astma, ta sinti diferente holó no plasentero i por último e refineria ta duna un bista ménos agradabel.

Pa e efektonan riba e organisashon, a wòrdu spliká ku tin mas gastu pa mantenshon di ekipo i otro material, ekiponan ta daña mas lihé, mester limpia ku mas frekuensia debí ku e shushi dje huma ta bin plak riba entre otro e edifisio di Habaai. Por último e fundashon a indiká ku nan por para tras di e lei nobo di medioambiente. “E lei mester keda implementá riba un forma adekuá dor di ekspertonan ku konosementu riba e materia tékniko” e representante di Bírgen di Rosario a splika den sala di parlamento.

Maria Nita kende ta representá e frakshon di MFK mesora a kuminsá puntra kon a bini ku e idea pa ubiká un organisashon manera Birgen di Rosario den e área di Habaai. Sinembargo, e parlamentario a puntra kiko e motibunan tabata e tempu ayá pa establesé e organisashon kaminda e ta aktualmente.

.