Willemstad—Na prinsipio di aprel, Raymond Jamanika a keda nombrá direktor di Human Rights Defense Curaçao (HRDC) despues di un proseso di selekshon. E director nobo tin un karera largu i variá na tantu Hulanda komo riba su isla natal Kòrsou. Sr. Jamanika a traha den sektor privá i den sektor públiko, pero tambe semper a demostrá su kompromiso soshal ku diferente organisashon. E ta un ehèmpel di un persona di sektor privá ku tambe ta komprometé ku temanan general i importante pa hinter nos komunidat.

E aña aki ta marka un punto importante, ya ku ta selebrá e promé lustro di HRDC ku a keda fundá na desèmber di 2019. HRDC por mira atras ku orguyo i satisfakshon riba 5 aña yená ku aktividat, reto, trabou duru i resultadonan konkreto.

HRDC a logra haña sosten finansiero i tékniko di vários organisashon internashonal, pero tambe di empresanan lokal i donantenan individual. Hopi atenshon a keda dediká na promové konosementu i komprenshon pa derechinan humano den nos komunidat, serka NGOnan i tambe outoridatnan na Kòrsou i Hulanda.  Den e kuadro aki a enfatisá trato digno di indokumentadonan, detenshon humano di nan, sigur e migrantenan di krísis i refugiadonan riba nos isla. Ademas, HRDC ku regularidat ta laga tende di dje riba otro temanan di derechi humano manera aspektonan di e pandemia di COVID, i tambe Ombudsman pa mucha ku ahinda no ta reglá.  

Ademas a fiha atenshon riba e relashon entre derechinan humano ku demokrasia i estado di derechi. Asina ei den último tres aña nos a para ketu na Dia Internashonal di Demokrasia ku a keda konmemorá ku charlanan bon bishitá i ku oradónan di taya. Konforme desishon di direktiva di aprel 2023, ta amplia i profundisá e vínkulo entre demokrasia i derechinan humano mas ainda. E tema di migrashon manera derechinan humano di estranhero i inklushon di migrantenan ku por yuda nos engradesé nos komunidat, ta keda importante pa HRDC. Tambe lo pone atenshon na desaroyonan internashonal importante ku tin un impakto riba derechinan humano di un i tur, pues tambe aki na Kòrsou.