WILLEMSTAD – E siman aki lo traha un plataforma di organisashonnan di sektor públiko i privá huntu ku NGO’s pa traha na solushon pa e kuestión di migrante den krisis na Kòrsou.

Esaki ta un di e resultadonan di e di dos Mesa Rondo strategiko organisá pa Human Rights Defense Curaçao (HRDC) den Avila. i na kua representantenan di gobièrnu, organisashonnan di empresarionan i sindikal i sosiedat sivil NGO’s, organisashonnan internashonal i gruponan religioso a partisipá. E konferensia tabata organisá pa HRDC ku sostén di  Sociaal Economische Raad (SER).

E plataforma mester entrega un relato di no mas di dos página den un siman ku ta deskribí solushonnan praktiko, ku despues por sirbi komo guia pa formulashon di maneho pa un merkado di trabou mas inklusivo, den kual tambe migrante den krisis ta hunga un ròl.

Esei tabata e motibu mas importante pa organisá e promé Ronde Tafel riba e tòpiko di Merkado di Trabou i Migrashon na ougùstùs 2022, entre otro komo un “follow up” di e Conferencia tokante Migrashon organisá pa SER na mei 2019.

E orador prinsipal tabata  e eksperto di empresa sostenible John Bliek di Organisashon Internashonal di Trabou (ILO). El a duna un presentashon bon dokumentá, ku datos di investigashon mas aktual, bou di titulo “Building Communities: The Economic Benefits of Integrating Migrants into Local Economies”. Otro oradónan tabata sr. Fabio Siani di Ofisina di Refugia di Nashonnan Uni (UNHCR/ACNUR) i e empresario konosí Jean Fayad, ku a papia na nòmber di sektor privá.

Un testimonio speshal tabata di señora Natalie Molina Rodriguez, ku a risibí sosten di su yu Edgardo. Nan a migra ocho aña pasa for di Venezuela i a skirbi un karta na nomber di tresshen (300) profesional Venezolano sin papel di residensia na promé Minister Gilmar Pisas pa pidi pa habri e kondishonnan strikto di un programa di Integrashon Responsabel pa profesionalnan independiente tambe. Te awor e petishon no a keda honrá.

Maneho di poblashon

Segun HRDC, gobièrnu di Kòrsou tin lastimamente defisiensia den su maneho di migrashon i maneho di poblashon, ku ta resultá ku un grupo grandi di migrante den krisis ta keda den sombra ku tin konsekuensianan grandi. No solamente pa e migrante mes, sino tambe pa Kòrsou su ekonomia, ku por provecha di un bon match di skills i trabou.

Human Rights Defense Curaçao ta mira ku tin un defisiensia na ekspertonan na e isla i trahadónan studiá, parsialmente pa e enbehesimento i e migrashon di yu di Kòrsounan pa Hulanda òf Boneiru.

Mientras tin un potenshal enorme di hende muhé i homber hoben, tin biaha henter famia, ku ta biba den e margen di nos komunidat, invisíbel, ignorá, manera si nan no ta eksistí. Algun di nan ta biba na Kòrsou mas ku sinku aña, sin permit di residensia òf permit di entrada.

Entre nan tambe tin hende ku tin edukashon haltu, manera dokternan, inhieneronan i profesonalnan di IT, kende no ta permití aki, ilegal, bibando den miedo pa wordu detené i deportá, òf abusá. Niun hende no sa kuántu nan ta, kuantu muchanan a nase sin status. No ta konosi tampoko kuanto a bandoná Korsou,  pa yega bou di kondishonan peligroso na otro país, manera  Estados Unidos.

Plataforma multi-stakeholder

E plataforma nobo lo ta un kombinashon di representante den sektor privá i públiko, manera organisashonnan di empresarionan, sindikatonan i representantenan di ministerionan manera Desaroyo Sosial, Labor i Bienestar, Hustisia, Desaroyo Ekonomiko i Asuntunan Públiko i Planifikashon i Servisio i organisashonnan no gubernamental manera Human Rights Defense Curaçao.

Representantenan di  ILO i UNHCR/ACNUR a indika ke por duna asistencia tekniko i konosementu den benefisio di e plataforma di multi-stakeholder aki.