Sistema: anotashon kon a traspaso di akshonnan a tuma lugá envolviendo Ennia Caribe Holding.

Punda—Propietario i Presidente Ehekutivo di Parman Internashonal, kual kompania tambe ta propietario di Ennia Caribe Holding, Hushang Ansary tin por lo ménos 970 mion na akshon den 2 kompania. Ámbos kompania ta registrá riba bolsa di balor na Estádos Unídos. Ta trata di Kirby Corporation i Nabors Industries.

Grupo Ansary a atkerí interes den e dos kompanianan despues di a bende su akshonnan den Stewart & Stevenson, e kompania kual e la laga departamento di invershon na Ennia kumpra partisipashon. Ta trata di un invershon ku grupo Hushang Ansary a hasi durante kasi mesun periodonan pa atkerí Kirby Corporation via Ennia i despues Nabors Industries. Na e momentunan aki, tin un konflikto sivil serio pa CBCS por logra ehekutá benta riba propiedat i aktivonan di Hushang Ansary. Tantu Parman International komo Banko Sentral a apstené di bai mas profundo den korte riba algun di e invershonnan di Hushang Ansary, durante tratamentunan. No solamente den Kirby Corporation sino tambe den un di dos kompania, Nabor Industries. Nabor Industries pa un motibu òf otro,  a keda kasi pafó di Korte.

Dokumentashon ofishal di e komishon nashonal estado unidense riba bolsa di invershon (United States Security and Exchange Comission) ta revelá algun informashon interesante ku tampoko no a presentá den korte. Entre yüni 2017 pa òktober 2017, Hushang Ansary a opta pa trese un kambio den su konstelashon di invershon. Pa por a logra esaki, tur direktor huntu ku nan apoderadonan den e konsorsio di Ennia na Kòrsou i Parman na Estádos Unídos mester a firma. Segun dokumentashon ofishal di e Komishon estado unidense ta trata di representantenan na Ennia Caribe Holding, EC Investments BV, Parman International BV, EC Investments International Sarl (Luxemburgo), Parman Capital Group LLC,  Parman Enterprises LLC, Kirby Corporation (USA). Den un di dos dokumentashon di kambio serka e grupo di invershon, mester a firma direktornan i representantenan di Parman, Ennia Caribe i tambe di Banco di Caribe huntu ku Banco di Caribe Investments BV.

Tur e kompanianan ariba menshoná tabata forma parti di e konsorsio di Parman, kual Hushang Ansary tin mayoria akshon i ta ainda ta doño di Ennia Caribe Holding na Kòrsou. E grupo di Ansary, ta wòrdu manehá pa direktornan di e kompanianan di Kirby Corporation, Nabors Industries i su yu muhé, Nina. Nan a hasi  traspaso di interes bionario den konstelashon di grupo Parman di Ansary. E promé ta benta di akshon entre Stewart and Stevenson (Parman)  ku Kirby Corporation. E di dos ta konserní atkishon di 8.8% di grupo Ansary den Kirby Corporation. E di tres ta konserní atkishon di 6.7% di grupo Ansary den Nabors Industries. En total ta trata di traspaso di aktivonan balorá na 970 mion florin.

Riba 13 di sèptèmber 2017, temporada ku José Jardim ya tabata direktor na Banko Sentral, Hushang Ansary a raportá un tomo pasivo di 8.8% den Kirby Corporation. Kirby ta balorá na 4.2 bion dòler riba merkado di bolsa. I riba 6 di novèmber 2017 Reuters ta anunsiá  ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler. Remarkabel ta ku kontrali na Kirby, Stuart and Stevenson, Snapchat  i Mullet Bay, Nabor Utilities a keda kasi kompletamente for di e diskushonnan  di korte sivil. Esei durante ámbos tratamentu grandi di e kaso na desèmber 2020 pero tambe te ku e veredikto na 2023. Unu di e nòmbernan ku a aparentá den e dokumentashonnan, ku no a keda menshoná den korte ta Ildefonds S., kende a firma pa Banco di Caribe plùs Banco di Caribe Investments. Entretantu e no ta na e banko mas.