Inspektor di Salubridat Serving Keli

WILLEMSTAD – Manera direktiva di Curaçao Medical Center (CMC) a asumí, Inspektor di Salubridat Serving Keli lo no ehekutá e medida ku tabata planiá, di asigná un eksperto pa supervisá i kordiná e proseso di referí pashèntnan ASA-1 i ASA-2 pa Antillean Adventist Hospital pa motibu di listanan di espera.

Den un karta separá e lo reakshoná riba e kontenido dje karta di e direktiva den kua a bis’é ku nan ta bou di e impreshon ku ta hungando un wega polítiko i a konseh’é pa no bira un pòpchi i kontribuí den esaki.

Direktiva di CMC a reakshoná na tempu i a indiká den su karta di ta sali for di e punto di bista ku Inspekshon lo suspendé e ehekushon dje desishon. CMC a splika e Inspektor di no ta di akuerdo ku e desishon akí i a entregá un apelashon kontra esaki na Korte di Promé Instansia. Komo ku un desishon riba e apelashon akí lo a tarda, nan a skohe pa suministrá e informashon ku e Inspektor a pidí tòg, pa evitá e medida planiá. I manera e Inspektor a informá e direktiva den su karta fechá 27 di òktober, el a kanselá e medida i lo tuma kontakto ku e direktiva despues tokante e trayekto relashoná ku e situashon hopi preokupante di e problema di lista di espera.

Inspekshon di Salubridat a tuma e desishon dia 5 di òktober último pa imponé un medida di poder gubernamental riba HNO Transitie en Exploitatie NV, konosí komo CMC, relashoná ku asignashon di un eksperto pa supervisá i kordiná e proseso di referí pashèntnan ASA-1 i ASA-2 pa Advent. E medida akí lo a drenta na vigor dia 17 di òktober último, sí CMC no a suministrá e informashon indiká den e desishon dje Inspektor pa mas tardá 16 di òktober. CMC a pidi mas tempu pa reakshoná i a haña te 23 di òktober 11’or di anochi. Direktiva di CMC a reakshoná na tempu i a entregá e informashon pidí pa kumpli ku e petishon di Inspekshon. Ademas e direktiva a reakshoná hopi malkontentu ku e manera ku e Inspektor a atendé ku henter e asuntu.

E direktiva a indiká di a hasi tur esfuerso pa organisá e proseso segun deseo di Inspekshon, i nan a inkluí e Inspektor ademas den e problemanan ku nan a topa i a suministrá informashon ku e Inspektor a pidi semanalmente. “Sinembargo bo a tuma e desishon den kua bo ta ninga ku nos a tuma akshon i ta asta impliká ku nos no a hasi nada.” E direktiva a splika Keli den e karta ku e ta pretendé ku nan falta un sentido di urgensia na CMC, miéntras e akshonnan di CMC ta demostrá kontrali.

“E maneho di Inspekshon den e konteksto akí ta bai kontra e prinsipionan básiko di bon gobernashon. Nos a tuma e problema di lista di espera mashá na serio i nos ta konsiderá ku CMC mes, Inspekshon, e pashèntnan i komunidat den general, ta benefisiá na buska un solushon den un bon konsulta ku otro. Referí pa Advent ta forma parti di esaki, pero esaki ta rekerí un enfoke bon pensá i kouteloso, kaminda ta tene kuenta tambe ku e retonan ku CMC ta konfrontá. P’esei nos ta insistí riba un kolaborashon bon i konstruktivo.”

Segun e direktiva, e maneho di Inspekshon no ta dañino solamente pa CMC i e dunadónan di kuido, pero tambe pa e konfiansa ku komunidat mester tin den kuido médiko di Kòrsou. “Inspekshon ta mina e konfiansa akí. Nos no por evitá e idea ku kuido médiko di Kòrsou den general i kuido di hòspital den partikular a bira un wega polítiko. Inspekshon no mester ta un pion den esaki. Nos ta insistí riba un kolaborashon bon i konstruktivo, kaminda kada ken for di su punto di bista i responsabilidat, ta traha pa sigurá aksesibilidat, kontinuidat i kalidat di kuido médiko.” Riba tur esaki, Inspektor ta bisa den e karta di djabièrnè último, di lo reakshoná ariba den un karta apart.