Kenepa- Museo Tula ta birando un atrakshon importante pa Kòrsou. Despues di nan apertura “nobo” algun siman pasá, mainta tin hende dilanti porta di museo pa drenta. E organisashon Fundashon Museo Tula, tin trabou nan dilanti.

Tabata 25 di Febrüari último, ku Fundashon Museo Tula, ku asistensha di boluntarionan a hasi un re-apertura di e museo. Tabata un seremonia ofishal unda a inisiá ku un marcha di entrada kòrtiku kompania ku muzik di Tambú,  unda invitadonan a kana drenta kura di lanthùis pa afirmá i reklamá poseshon di e lanthùis komo e kas pa museo Tula. Despues di e kana un rònchi den kura, invitadonan a drenta e lanthùis pa patras den pòrch, por a asistí na e seremonia i presentashon. Promé di a pasa pa e diskursonan ofisial a tuma un ritual presentá pa Rosemarie Sling, Celsio Martha, Cynthia Sluis i Jeanne Henriquez. Esaki tabata un obra di arte, kual a risibi un alokashon den unu di e kambernan na e Lanthùis.  Despues di e bunita ritual a sigui e parti di diskurso. Presidente di e fundashon sr. Shurbey Alberto a hiba e diskurso inougural mustrando riba importansha di e museo miéntras e hóben Christopher Rosinda a splika e importansha pa hóbennan di Kòrsou ta konsiente di Tula.

Pero e museo no a keda te einan. Na e momentonan aki interes ta haltu pa bishita e museo, segun Jeanne Henriquez, motor tras di e proyekto. Tin hopi bishitante a kuminsá mustra nan interes for di dia tabatin e apertura i awor e problema ta birando kordinashon logístiko. Ku mas interes, e fundashon mester di mas rekurso pa por manehá e oumento den interes. Un kos ta sigur, Museo Tula a trese mas balor pa e área di Kenepa.