Kade Wilsoe: inhustamente di stèmpel pa Ministerio Públiko komo sospechoso den morto di Wiels. Un kombersashon telefóniko mainta tempran promé ku 7 or entre Wiels i Wilsoe, tabata e motibu dikon Ministerio Públiko a sospecha Wilsoe. Tur djadumingu, Wilsoe i Wiels, tabata traha afsprak unda pa topa.

Jan Thiel—Eks konsehero i minister pa Helmin Wiels, Kade Wilsoe, semper tabata kombensí ta un fayo di RST a kondusí na morto di Helmin Wiels. Wilsoe, temporada e tabata minister, a traha ku RST i sa kon nan ta funshoná. Pa 7 aña largu, Ministerio Públiko inhustamente a tene Wilsoe komo sospechoso, sabiendo ku Wilsoe no tabatin nada di haber ku e morto di Wiels.

Lokual si Wilsoe tabatin ta desakuerdo ku RST i influensha hulandes den hustisia na Kòrsou. Helmin Wiels, aparte di a ninga pa Wilsoe bolbe bira minister di hustisia, a tene su konsehero pafo di e kòmbersashonnan ku RST. Kade Wilsoe tabata eks minister di hustisia pa Pueblo Soberano durante e kabinete di Schotte. Despues di e problemanan entre Pueblo Soberano i MFK na terser kuartal di 2012, Helmin Wiels a kuminsá deshasí di e idea pa mantené e kartera di hustisia, lagando Kade Wilsoe for di e siguiente kabinete di profeshon. Te awe, Pueblo Soberano ni Wiels nunka no a duna un motibu públiko dikon a laga e kartera di hustisia kai, pero despues ta bin sali na kla ku un investigashon kontra di Jorge Jamaloodin tabata probabel.

Segun Kade Wilsoe, Eric K, eks hefe di RST  tabata bai serka Helmin Wiels pa haña un posishon komo konsehero di minister di hustisia. E deklarashon aki di Wilsoe  ta kuadra pasobra en bèrdat despues ku Navarro a prolongá su posishon komo minister di hustisia den kabinete Asjes riba 7 di yüni 2013, Eric K. algun siman despues a bira unu di su konseheronan. E anochi riba 5 di mei 2013, durante un rueda di prensa na Fòrti pa informá riba e asesinato di Wiels, Eric K.  tabata sintá na mesa huntu ku miembronan di kabinete Hodge. E tabata einan sint’a komo hefe saliente di RST i siguiente konsehero pa Ministerio di Hustisia. Ni RST ni tampoko Erik K., no a menshoná ku Helmin Wiels tabata nan informante. E informashonnan ku Wiels tabata duna RST tabata peligroso i delikado. Korte di Hustisia, den nan prome verediktonan den Maximus a konkluí ku e informashonnan riba robonan di oloshi, tabatin relashon ku morto di Helmin Wiels.

Segun Kade Wilsoe e kòmbersashonnan entre Wiels i Eric K, a lanta sospecho den baho mundu ku a kondusí na morto di Wiels. Esei ta nifiká ku RST, nunka no tuma prekoushon pa protehá Wiels, kisas komo nan informante.