Imáhen di atrako na yüni 2022 ku despues a resultá importante den kaso asesinato Wiels.

PUNDA— Konfirmá pa Korte den Promé Instansha: pa por komprondé morto di Wiels, mester start na yanüari 2012. For di filenan den korte i di Ministerio Públiko, por konkluí ku defuntu Florentina tabata “un brain” den set up di robo i asesinato. E fecha mas importante den morto di Helmin Wiels ta 28 yanüari 2012.

Riba e dia en kestion, defuntu Pretu Florentina den kompania di mas hòmber,  a biaha pa Aruba. Fo’i Hato nan a bula bai pa èrpòrt di Reina Beatrix. E hòmbernan tabatin un meta spesífiko: “robo di Rolex”.    Na Aruba Florentina a studia tur kos adelantá i splika miembronan dje grupo ku nan ta bai kometé un atrako na Renaissance Mall den Playa. Esaki lo tuma lugá den Gandelman Jewelers. E grupo riba e dia en kestion a logra hòrta un kantidat di 42 oloshi. E plan tabata pa hòrta 54, pero 12 oloshi a keda atras. E bolsa di e robo a generá 416 mil florin. Ministerio Públiko ta sospechá ku den e robo aki 3 hòmber mas a biaha ku defuntu Florentina. Ta trata di Jean Carlo C.,  Ryangelo Z. i un di tres hòmber di fam O.. Segun informashon di Ministerio Públiko, e hòmbernan a repartí e bolsa di 416 mil florin den nan 4. Fiskal Out, kende a asistí Gert Rip den kaso Maximus a organisá dos seri di interogashon riba  Ryangelo Z i Jean Carlo C.. E promé seri di interogashon a regarda e robonan di oloshi na Aruba riba yanüari 2012 i yüni 2012 na Kòrsou. E último robo aki tambe a tuma lugá na Renaissance Mall na Rif unda defuntu Florentina tabata envolví. Pero fiskal Out i Rip a kuminsá traha riba e robonan te na 2017, 5 aña despues ku morto di Wiels a kai. Dikon, dos fiskal ku ta investigando e kaso di Wiels, ta bai bek den un kaso 5 aña despues? Ministerio Públiko a start un investigashon riba robonan di oloshi pa por trata na pone un relashon entre e morto di Wiels i Pretu Florentina, kende tabata organisá e robonan. Por ehèmpel a arestá Jean Carlos C, riba 7 novèmber 2017 i Ryangelo Z.  riba 23 di mei 2018. E lógika ta sinta den hecho ku Ministerio Públiko, kier a buska e relashon entre e plakanan risibi pa benta di e oloshinan i asesinato di Helmin Wiels. P’esei Korte den Promé Instansha a bai bek na Yanüari 2012.

Pa tal motibu e promé fecha dje robonan, 22 yanüari 2012 ta e fecha mas importante durante investigashonnan dje asesinato di Helmin Wiels. Biniendo bek riba e fecha en kestion, 22 di Yanüari 2021, Pretu Florentina kende a organisá e morto di Wiels a bula pa Aruba i kometé un atrako ku C. i Z.. Tantu Jean Carlo C. komo Ryangelo Z.  a keda someté na interogashon riba un di dos seri di interogashon pa kaso Maximus. Ministerio Públiko no a logra saka nada konkreto for di nan deklarashon. Tampoko nan a logra deskubrí ken a paga e 416 mil florin pa 42 oloshi marka Rolex. Hasta a pone Z. den un sel apart na Aruba i despues transporte pa Ulanda, den un programa di protekshon. Fiskalnan Out i Rip a sambuya profundo pa por logra haña Z. i C. den korte i trata na yega na un dil ku nan riba Maximus. Ámbos hòmber a desmentí di tabata den kompania di Pretu Florentina riba 22 di yanüari riba e buelo di Aruba. Pero un “vingerafdruk” di Juan Carlos C. riba unu dje hèlmunan di bròmer a kologá e yu di Kòrsou. E dos fiskalnan, realmente no tabata interesá den e robonan di oloshi, sino kiko Z. i C. tabata sa di Jorge Jamaloodin, Nini Fonseca i  defuntu Luigi “Pretu” Florentina. E dos fiskalnan, tabata kier sa spesífikamente si na yüni 2012, despues di un robo di oloshi na Kòrsou, Jean Carlo C.  huntu ku Pretu Florentina a kore bai bende e oloshinan serka Jorge Jamaloodin. For di Coffie nada no a bini afó, tòg Ministerio Públiko a bai korte ku e prueba kual den Korte di Apelashon a keda rechasá den kaso Jamaloodin.

Despues di Yüni 2012, na Febrüari 2013 Helmin Wiels a kuminsá papia ku RST. Den seno di Pretu Florentina, via di un dama ku tabata traha na un kompania di importashon i eksportashon, e informashon a bin lèk. E dama aki te ku dia awe a disparse. Pero e tabatin kontaktonan ku RST pero alabes tabata spion i informante di NLS. Asina, eks miembronan di NLS i miembronan di e geng nobo “Yankees” a bin haña e rabia nesesario riba Wiels.  E sirkulo di defuntu Florentina a risibi informashon ku Wiels tabata suministrá RST ku informashon pa por a trata na kologá koredónan di kampana di MFK i nan sostenadonan.  Na aprel 2014, momento a sali den Vigilante ku Helmin Wiels a papia ku RST, ni Ministerio Públiko no tabata por a komprondé kiko tabata pasando. Ni fiskal Gert Rip no a mira  e motibunan dje oloshinan sino te na 2017, momento el a kuminsá pèrsigui i arestá C. i despues Z.. Pero fo’i Jean Carlo C. e no logra saka nada, ni e 93 mil florin kual supuestamente Pretu lo a dividí entre nan 4. Ryangelo Z. no tabata por a pone un relashon entre e bolsa di oloshi hòrtá i asesinato di Wiels. E vishon di tùnel di fiskalnan Rip i Out a bin pega.