Konfiská: riba 18 di yüli a konfiská un arma di kandela ku tabata den morto di Boechi. En total segun Ministerio Públiko, tabatin presensha di 3 arma di kandela.

NIEUWE HAVEN—Un investigashon bastante amplio ku asistensha di kámaranan públiko di Punda pa Sta. Maria,  kombiná ku mastnan di telefòn selular a logra solushoná e kaso Hummer. Ta trata e kaso unda Rushendel Boechi Windster a pèrdè su bida riba 9 di desèmber 2022.

Investigadónan a kompilá datos di kámara i telefòn pa solushoná e problema. Segun kámaranan públiko, riba 9 di desèmber Boechi i su amigunan ta yega Punda 10.23 PM den dos vehíkulo. Boechi tabata manehá un Hummer pretu i tabata den kompania di tres amigu, Klas, Schotborg i Anthony. E otro outo tabata un Vitz. Despues e grupo di Boechi a opta pa sali fo’i Punda, pero Boechi ta bai den e Vitz miéntras dos otro amigunan ta bai den e hummer.

Despues di a sali Punda, e dos outonan Hummer i Vitz ta yega 10:45 PM riba Rooseveltweg unda e hòmbernan a dirigí nan mes pa Auto Nation, unda tabata un evento pa inskribí den un aktividat di outo. Miéntras investigadónan tabata vigilá e Hummer subi Rooseveltweg, netamente 11:11 PM ta mira e Hyundai unda Zimmerman i Coffie subi Rooseveltweg. For di e momentonan ei, tabata bisto ku e Hyundai tabata sigui e Hummer. Na momento e grupo di Boechi a yega Auto Nation, e Hyundai a pasa diferente biaha ta kore pasa wak e Hummer. E Hyundai a hasta yega i stashoná banda di e Hummer pero nèt 11.48 PM Boechi ta pasa banda di e Hyundai i drenta e Hummer kore bai. E Hyundai a sigui e Hummer pero Boechi(nan) a bai na e ATM na Pomp di Sta Maria pa baha sèn. E Hyundai ta sigui kore bai pero ta bira bek den lus kòrá i bin bek stashoná kontrali di e pòmp na St. Maria. Seguidamente e Hummer ku Boechi ta sali bai direkshon na e snèk Expresso riba Rooseveltweg. Einan e hòmbernan den kompania di Boechi a baha fo’i outo pa bai kumpra kuminda.

E Hyundai ta stashoná dilanti di e snèk. Despues riba imágennan di vidio ta mira e tirunan fatal sali for di e Hyundai blanku i Boechi ta bai suela. E amigunan di Boechi ta kore bini pero ta yega lat i unu di nan ta sak kue un arma di kandela banda di Boechi i lòs dos tiru den laira. Imágennan di vidio ta mira e Hyundai kore di Rooseveltweg subi Argentinaweg bai.

Despues famianan di Windster, entre otro tata di Windster Hubert Windster a rekonosé e kurpa sin bida di Boechi. Investigashon di patólogo a konkluí ku for di  7 bala, 6  a alkansá Boechi kual dos a perforá su brasanan robes i drechi miéntras un bala a perforá ámbos pulmon i kibra su ader prinsipal (aorta). Na e sitio tabatin un Kia Picanto ku tambe tabatin perforashon di bala. A konstatá ku tabatin 7 huls di 19 mm kual polisnan a konfiská tur pa investigá.   E rapòrt ta konkluí ku tabatin por lo ménos 3 arma diferente a wòrdu uza na e insidente. Unu tabata fo’i outo di Zimmerman – Coffie, unu tabata for di Boechi Windster i tabatin un di tres arma ku Ministerio Públiko no por a duna detaye di dje ayera. Pa lokual ta trata e arma di Boechi, su amigu Schotborg a kue e arma  i lòs dos tiru den laira despues ku e Hyundai blanku a kore bai.

Tabatin diferente testigu ku e deklará riba e suseso. E tres amigunan di Boechi a deklará pero tambe un fanátiko di fam C, kende a bin trese su yu pa Boechi por a kanta un kantika pe. E yu tabata fanátiko di Boechi i huntu ku su mama, nan a para mira tur kos pasa unda nan a deklará ku tabata un hòmber di postura largu a saka su kurpa mitar fo’i outo pa lòs bala riba e artista. Segun e testigunan, e hòmber kende a lòs e tirunan tabatin su kabes tapá. Despues di a tira e artista nan a kore bai.