Willemstad —Djárason 5 di Aprel e tim di Aqualectra ku ta enkargá ku kombatimentu di uso illegal di awa i koriente, den un akshon  ku a tuma lugá na wikènthùisnan den área di Lagun, a konstatá un kantidat di adrès ku ta hasi uso illegal di awa i koriente. 

Mesora a tuma e akshonnan korespondiente i a deskonektá nan konekshon for di e ret di Aqualectra.  Esnan responsabel pa e kasnan aki, kaminda konstatá e illegalidat   lo mester kana e kaminda apropiá na Aqualectra pa asina por haña konekshon bèk riba e ret di awa òf koriente na un forma legal. E akshon aki di Aqualectra di djárason ta forma parti di e esfuerso kontinuo di Aqualectra pa kombatí uso ilegal di awa i koriente rònt Kòrsou.  Djaweps 6 di Aprel lo sigui ku e akshonnan den mas área kaminda tin wikènthùis.

Punto di salida ta ku no ta hustu ku gran mayoria di klientenan di Aqualectra kumpli ku nan debernan komo kliente i hasi uso di awa i koriente na un forma legal i tin un grupo den nos komunidat ta kometé akto ilegal dor di konektá na forma ilegal riba e ret di awa i koriente di Aqualectra. Aqualectra semper a monitoriá e loke popularmente ta konosí komo ‘lekverlies’. Esaki ta e diferensia entre e loke ku ta produsí na awa òf generá na koriente i loke ta pasa den e meter di kliente pa por fakturá esaki. E diferensia aki, ku a keda denominá komo ‘lekverlies’, por tin diferente kousa, entre otro uso ilegal.  Den akshon ku a tuma luga na Lagun a konstatá 4 adrès ku ladronisia di koriente, na 3 adrès tabatin ladronisia di awa i na un adrès a kontstata ku despues ku a deskonektá e kliente pa motibu di falta di pago, e a rekonektá su mes ilegalmente bèk.

Aqualectra a bin ta adaptá su método di kontròl. Si ántes tabata kontrolá na meter so i tuma medida atministrativo, awor ta deskonektá koriente òf sera e awa te na momento ku e kliente bin Aqualectra pa atendé ku e but i tambe e debe ku tin habri na e momento ei. Aki e kolaborashon di e kliente pa kumpli ku su deber ta altamente nesesario. Den kaso ku e kliente no kolaborá, konforme stipulashon den e artíkulo di konekshon di Aqualectra, lo por laga e parsela sin awa, koriente òf tur dos produkto te ora por verifiká ku tur kos ta segun regla den e instalashon i a kumplí ku saldo habri.

E but ku mester paga ta un suma di 1,000 (mil) florin pa e (kada) iregularidat kometé. E kliente mester paga tambe e gastu di rekonekshon ku ta 250 (doshen sinkuenta) florin. Si tin saldo habrí, mester paga esaki mesora pa por keda rekonektá.

Ta pidi un i tur, pero prinsipalmente personanan ku a hur un wikènthùis, pa tene kuenta ku Aqualetra ta hañ’e ta tuma akshon, den kaso ku konstatá konekshon ilegal riba ret di awa i koriente na e wikènthùis.   Lo rekonektá e wikènthùis bèk te na e momentu ku e doño di propiedat tuma e pasonan nesesario i por konektá e propiedat na un forma legal riba nos ret di awa i koriente. Rekonekshon lo tuma lugá solamente den orarionan normal di trabou. Lo no hasi esaki despues di ora di trabou ni fin di siman of diana di fiesta.