Un bahada di tarifa pa institutonan di enseñansa lo nifiká inmediatamente un subida di e tarifa doméstiko

WILLEMSTAD – Parlamentario Giselle Mc William tabata ke sa mas di Minister di Enseñansa, Siensia, Deporte i Kultura (ESKD) Sithree “Cey” van Heydoorn tokante tarifa di awa i koriente di Aqualectra pa skolnan. E Minister a splika den kòrtiku ku pa skolnan ta konta tarifa regular, meskos ku ta konta pa un kas regular. A pensa riba ahuste, pero esaki lo tin efekto negativo pa kasnan di famia.

Segun e Minister, den pasado a yega di aserká Ministerio di Desaroyo Ekonómiko (MEO) i Bureau Telecommunicatie & Post (BTP), pero ahuste di e tarifa pa institutonan di enseñansa públiko no tabata posibel, konsiderando e sistema di ahuste di tarifa. Van Heydoorn a splika: “Un bahada di tarifa pa institutonan di enseñansa lo nifiká inmediatamente un subida di e tarifa doméstiko. Na e momentu akí mi ta den deliberashon pa evaluá otro posibilidatnan pa por konsiderá aplikashon di un tarifa redusí pa skolnan.”