Na 2023 tabatin un kantidat di 1176 beibi ku a nase, kual ta 56 beibi ménos kompará ku 2022.

Willemstad, — Denter di e 10 último añanan tin un porsentahe di 40 porshento ménos beibi ta nanse. 

Segun CBS tin un bahada di 40 porshento di kantidat di beibinan ku a nanse na 2023 si kompará esaki ku 2014. Rapòrtnan ta indiká ku en bèrdat tin un kambio históriko den kual hende muhé ta hañando ménos yu na Kòrsou. Na 2014 tabatin 1963 beibi ku a nanse, na 2019 tabatin 1583 beibi ku a nanse, i na 2023 tabatin 1176 beibi ku a nanse.  Sifranan di CBS ta duna di konosé ku den e tres añanan promé ku 2016, tabatin un disminushon relativamente fuerte den e kantidat di nasementu ku a ser registrá na Kòrsou. Entre 2014 i 2016 tabatin un rebaho di 174 mucha ku a nanse na Kòrsou. E disminushon aki, un porsentahe di 9% di rebaho i ta un desaroyo mas intensivo ku loke tabata sperá.

Un di e posibel faktornan ku por a kontribuí na e disminushon di fertilidat na Kòrsou den añanan 2014, 2015, i 2016 ta pa motibunan di faktornan biológiko. Esaki ta entre otro e brote di dos epidemia di malesa ku ta ser transmití un despues di otro den e periodo di 2014-2016, e epidemia di Chikungunya di 2014/2015 i e epidemia di Zika di 2016. Segun sifranan di ministerio GMN tabatin 20.000 persona ku a keda afektá ku Chikungunya den aña 2014. Nuebe luna despues di e epidemia di Chikungunya a nota ku e kantidat di personanan ku ta nanse a baha.

Na ana 2015 e kantidat di yunan ku ta nanse a subi pero no ta kompletamentu sigur ku ta pa motibu di  Chikungunya hende muhé a stòp di haña yu ya komo otro desishonnan tambe por a hunga un ròl. Si data ta duna di konosé ku tabatin un disminushon den e periodo aki. Pa loke ta trata e epidemia di Zika, den aña 2016 tambe e kantidat di yunan ku a nanse a baha ya komo e notisia a yega Kòrsou ku e por afektá e salú di un baby resien nasé. Pues segun rapòrtnan parehanan tabata mas kuidadoso ku reprodukshon.

Segun rapòrtnan ta indiká tin diferente motibu pa kousanan di fertilidat ku ta baha na un pais. Esakinan por ta dor di faktornan biológiko, sikológiko, sosial, ekonómiko, kultural, i tambe faktornan polítiko. Otro faktornan ku a kontribuí na ménos fertilidat ta imigrashon di hende muhé stranhero na pais Kòrsou. Ku hopi hende muhé ta mas aktivo den e merkado laboral tambe un faktor ku ta kontribuí na ménos yunan ku ta nanse.