Dokterstuin,– Den 2017 Federashon Plataforma na interés di e pueblo di Bandabou (FPBB) a kuminsá e trayekto pa yega na un edifisio na Banda Bou kual lo a yuda fasilitá e implementashon di e vishon ku FPBB tin pa ku habitantenan di Banda Bou.

Durante añanan a sigui ku e trayekto aki, huntu ku Vishon Bandabou (ViBa).Na aña 2021, e direktiva nobo di FPBB tambe a sigui enkaminá e trayekto aki. For di 2017 a hasi diferente palabrashon entre FPBB ku ministerio di SOAW pa ku disponibilidat i mantenshon di e lokalidat di Kas di Bario Dokterstuin. Lamentabelmente, por konstatá ku sinku aña despues, FPBB ketu bai no ta disponé di e Kas di Bario situá na Dokterstuin. Mientrastantu, nos ta konstatá ku según tempu ta pasa, e edifisio, mirando ku e no ta wòrdu uzá dor di e ministerio ya menshoná, ta kai mas i mas den deterioro. FPBB ta lamentá esaki, mirando ku FPBB por hasi bon uzo di e lokalidat aki pa por implementá su vishon di un manera mas efektivo hasiendo maksimo uzo di e infrastruktura eksistente na Banda Bou.

E vishon di FPBB ta enserá entre otro re-enforsa, enpoderá e habitante di Bandabou di moda ku e ta bira doño di su propio bida i alabes halsa kalidat di bida. Esakinan FPBB ke logra pa medio di diferente kursonan manera di alfabetisashon, empresario (chiki/lora man), bida salú i mas. Tambe dor di organisá enkuentronan di tema den kual habitantenan por bini huntu, haña informashon i interkambia ideanan. E lokalidat lo wòrdu uzá komo un sentro di enkuentro pa organisashonan i habitantenan di Bandabou kual lo optimalisá e sinergia i kolaborashon entre organisashon na Banda Bou enorme. Tambe e lokalidat lo a wòrdu uzá pa muchanan ku no tin akseso na internet na kas, por hasi uzo di un sala di kòmputer, pa por traha nan tareanan di skol.

Ta di lamentá ku palabrashonnan hasí ku gobièrnu pa FPBB por disponé di e edifisio aki, no ta wòrdu ehekutá i ku últimamente e pueblo di Banda Bou ta wòrdu perhudiká. Esaki hustamente den un tempu, ku mester invertí aun mas tantu den e parti sosial i sosial-ekonómiko di Banda Bou. Ademas di esaki, awor mester bai hasi invershonnan mas grandi pa por restaurá e lokalidat den e estado ku e tabata pa por brinda habitantenan un lokalidat den un bon estado.

FPBB tambe ta enkontra retonan finanserio, meskos ku hopi otro organisashon, komo konsekuensha ku tampoko no por dispone mas di un trahadó sosial (regiocoordinator) manera anteriormente tabata e kaso. Esaki netamente den un temporada ku tin problemanan sosial agudo na Banda Bou. Direktiva di FPBB ta pera ku bini kambio den e pensamentu di gobièrnu i por aselerá e proseso pa FPBB por disponé di e lokalidat di Kas di Bario Dokterstuin.