NIEUWE HAVEN–  Apesar di un veredikto den apelashon mañan, kaso Ennia por lo pronto lo sigui sin un solushon definitivo i por tuma mas ku 2 aña di tratamentunan. Tin mas ku 10 kaso andando den kortenan lokal i internashonal, lokual ta pone e trayekto di solushon tuma mas tantu tempu.

E kaso di Ennia Caribe Holding kontra di Grupo Ansary, riba un claim di 1.1 miar florin, por lo pronto lo no yega na un solushon den korte. En total tin mas ku 12 kaso di claim andando den korte, miéntras mañan Korte di Apelashon tin un desishon pendiente, ku probablemente ta resultá den un tratamentu na mas korte i mas claim. Banko Sentral ta apoderá pa Korte den Promé Instansha pa konfiská tur propiedat di grupo Ansary pa bende. Por ehèmpel den kaso di Banco Caribe. Pero e struktura di Ennia ta kompliká i kada biaha purba bende un aktivo, ta start un claim di parti di Ansary, por ehèmpel benta Mullet Bay. Pa tal motibu ta importante yega na un solushon sin mester warda riba e tratamentunan di korte.

Miéntras tin e kasonan ta den korte, un Komishon Resolushon Ennia a keda instalá. E komishon a duna dos senario di solushon i ámbos solushon a keda sin konsiderá e kasonan den korte. Pero e problema di Ennia ta agudo i mester warda por lo ménos 24 luna pa korte finalisá e kasonan. Esaki por hiba e kompania den problema serio. Segun sifras someté pa e komishon, e bolsa pa seguro di bida na Ennia ta 1.5 miar florin, kual 1.2 ta forma pa gruponan (kompanianan, fundashon ets) miéntras solamente 300 mion ta den forma di penshun individual.  Na e momentonan aki, Ennia ta pagando kasi 4.500 penshonado mensualmente. Esaki ta un total di 3.5 mion florin mensual na pago.

Tin e posibilidat pa aseptá un proposishon di Hulanda pa finansiá e debakel okashoná na Ennia Caribe Holding. Esei aló ménos por komprondé konforme deklarashonnan di sekretario di estado interino, Alexandra van Huffelen i minister di finansas na Kòrsou, Javier Silvania. Ta trata di un fiansa ku por yega 700 mion florin i oumentá e debe nashonal di Kòrsou te riba 5 mil mion florin. Den kaso di Ennia te ainda, parlamento di Kòrsou ta negligente i no ta dunando reakshon riba seriedat di e oferta hulandes. Korte a laga imponé diferente beslag riba “aktivonan” material i inmaterial di Ennia ku tabata bou di maneho di Grupo Parman, pero alabes lagando habri ainda e posibilidat pa imponé beslag riba mas aktivo. Miéntras e proseso aki ta den korte, e oferta di Hulanda ta sin konsiderashon riba e resultadonan di korte. E desishon di korte pa ehekutá beslag riba propiedat di e.o. Ansary i kisas demas kousantenan, ta kambia e bista di e daño na Ennia konsiderabel. Por ehèmpel, e interesnan di grupo Parman den Kirby Corporation, konforme balor anotá riba bolsa di merkado por yega 440 mion dòler miéntras en un otro kompania, Nabors e interesnan por yega150 mion dòler, estado unidense. Ademas tin tambe ainda e tereno na Mullet Bay ku su balor riba merkado ta tópiko di diskushon aktual den kortenan sivil. E sifranan di balorisashon di e grupo Parman, ta motibu prinsipal pa Parlamentu di Kòrsou laga investigá promé laga e fiansa Ennia keda aprobá.