Kenneth Martis ta splika ku bo tin éksito ku reforma, nos mester tin tur nanishi den mesun direkshon.

Willemstad,– Señor Kenneth Martis di partido PIN ta bisa ku gobièrnu Pisas ta skonde kos pa loke ta e reformanan di impuesto. E ta bisa kon por ta ku Hulanda ta publiká e plan i pueblo di Kòrsou mes no sa di nada.

Segun Kenneth, PIN a yega na e konklushon ku ta skonde kos paso tin un karta ku a bai TWO. 21 di yüni minister interino di finansa a manda e karta pa kita for di nan “site” e plan figo pa reformá  nos servisio di impuesto.

Señor Martis ta puntra kon Hulanda sa di e plan di reforma i na Kòrsou niun hende sa mes ku a  diskutí ku tin e plan den e direkshon ei. “Anto si wak ku ta bisa ku ta pidi pa kit’é, no por yega na otro konklushon ku ta skonde algu òf ta tapa algu, òf ku nan a deskubrí ku esaki ta kontrali na kambio di COHO pa Onderlinge regeleing”, asina Martis ta splika.

E ta sigui bisa kon por ta ku Hulanda tin un plan ku niun hende a papia ni diskutí riba dje.

E ta splika ku e plan mester ta un plan lokal i pa PIN si mira e rapòrt di IMF kaminda ta bisa ku Kòrsou tin potensial, solamente si pone tur nanishi den mesun direkshon, i esei ta nifiká ku mester inkluí tur partido den un kos asina.

E ta sigui bisa ku esei no ta e kaso, si mira ku niun hende sa di e plan aki. E ta sigui bisa ku den koalishon mes tin hende ku a mira e importansia pa enbolbí parlamentu mas tantu den e proseso di reforma i a pidi pa bini ku un komishon temporal di parlamento pa kana huntu ku gobièrnu den e proseso aki.  Señor Martis ta splika ku PIN a puntra pa gobièrnu splika si ta asina ta sigui, pues si ta ku Hulanda so ta sigui diskutí reforma, paso mester sa esaki pa wak kon ta bai sigui atendé ku gobièrnu.

Di tur manera e ta bisa ku pa partido PIN, esaki no ta akseptabel i si ta asina bo ta hasi, bo no ta bai tin éksito ku e reforma, paso pa e reforma tin éksito, nos mester tin tur nanishi den e mesun direkshon.