Helmin Wiels, nunka no a revelá na niun hende su kòmbersashonnan sekreto ku RST.

PUNDA—Despues di a skibi 10 aña kontinuamente riba e kaso, sintando tur tratamentu penal di Elvis Kuwas, Nini Fonseca i Jorge Jamaloodin, den Korte di Promé Instansha i Apelashon, Vigilante ta publiká  2  artíkulo riba asesinato di Helmin Wiels. Esaki prinsipalmente pa e motibu ku awor Ministerio Públiko a sepon’é tur akusashon kontra di Robbie Dos Santo i asina porfin laga e teoria di SMS to Win kai.

Pa por inisiá e diskushon riba morto di Wiels, mester bai bek den lokual Kade Wilsoe e revelá durante su periodo di persekushon, kual na Mei 2020 Ministerio Públiko a kaduká tambe despues di 7 aña. Semper a kuestioná Wiels riba e kòmbersashonnan ku e tabata hiba den sekreto ku RST. Ta un misterio kompleto dikon fiskal di Ministerio Públiko i Prokuradornan General for di 2013 a tene kontenido di lokual Helmin Wiels a kombersá ku un alto funshonario di RST, un sekreto.  Na 2013 momento ku Vigilante a publiká ku diferente kòmbersashon entre Wiels i RST a tuma lugá, Ministerio Públiko a desmentí e informashon.

Pero na yüni 2019, 6 aña despues, Fiskal di Ministerio Públiko Gert Rip durante tratamentu den kaso di Jorge Jamaloodin, a atmití públikamente ku tabatin kombersashon entre Wiels i RST. Spesífikamente, Rip a bisa ku tabatin kombersashon, pero e dos hòmbernan no a papia riba un grupo di kriminal, sino riba otro “kos”. Pero dikon Ministerio Públiko a tene e kòmbersashonnan aki un sekreto pa Kòrsou durante 6 aña largu? I mas serio ainda dikon a pone un fiskal hóben, kende tabata Guilliano Schoop e tempu ei na 2013, bai dilanti i desmentí ku tabatin kombersashon entre Wiels i RST? Pa despues di 6 aña Gert Rip atmití tòg ku tabatin kombersashon. Dikon Ministerio Públiko a gaña Kòrsou 6 aña largu. Kiko Wiels por a papia, ku tabata asina importante pa pone Ministerio Públiko gaña. Ademas, nunka RST no a taha un prosès ferbal riba su kombersashon entre su persona i Wiels. Ministerio Públiko tampoko no a interogá ni traha un prosès ferbal riba kòmbersashonnan.

Ministerio Públiko a invertí miónes den persiguishon di Kuwas, Fonseca, Jamaloodin. A laga traha prosès ferbal di tur hende kende a papia ku defuntu Wiels, ku eksepshon di 1 persona. Esei ta eks Team Chef na RST. Na yüni 2013, apénas algun siman despues di morto di Wiels . Na yüni 2019, Gert Rip ta bisa den korte RST a papia ku Wiels pero no riba kriminal”. Esaki ta nifiká ku Gert Rip ta debidamente na altura riba e kontenido dje kòmbersashonnan di RST i Wiels. I nunka Rip no a laga traha un prosès ferbal riba esaki pasobra e ta bisa e kombersashon entre e dos hòmber no tabata relevante pa morto di Wiels.

Pero miéntras e kombersashon entre  RST i Wiels di Pueblo Soberano tabata konkretisá,  algun siman promé, ya kaba na aprel 2013, defuntu Luigi Pretu Florentina tabata na altura ku Wiels a papia ku RST. Den bario di Koral Specht, ku Florentina personalmente tabata kla pa pone Wiels drumi. Florentina durante mesun periodo a kuminsá los for di NLS i lanta “Yankees” huntu ku Burney Nini Fonseca. N’e momentunan ei, durante e spesífiko luna di aprel, tabata imposibel komprondé e relashon entre lokual Wiels a papia ku RST, robonan di bara di oro, atrako riba oloshi i finalmente e asesinato di Helmin Wiels.

Na Febrüari 2013 Helmin Wiels a kuminsá papia ku RST. Den seno di Pretu Florentina, via di un dama ku tabata traha na un kompania di importashon i eksportashon, e informashon a bin lèk. E sirkulo di Florentina a risibi informashon ku Wiels tabata suministrá RST ku informashon pa por a trata na kologá koredónan di kampana di MFK .