RIYADH – E kompania petrolero saudita Aramco, un di e gigantenan den e sektor energétiko na mundu, lo patrosiná e Federashon Internashonal di Futbòl (FIFA) te ku fin di 2027.

Ámbos partido a firma e akuerdo di patrosinio ayera. Aramco di e forma aki ta bira e sosio eksklusivo prinsipal di FIFA ku derechi den múltiple eventonan ku ta inkluí e kopa mundial maskulino i femenino di 2026 i 2027 respektivamente.

E akuerdo tin inkluí ademas un klóusula di posibel ekstenshon di kuater aña. Segun FIFA i Aramco, ta trata aki di un kompromiso ku ta inkluí inovashon i desaroyo. Esaki ta un kombinashon históriko entre e alkanse global úniko di futbòl i e inovashon ku semper Aramco a defendé.

“E union aki lo yuda FIFA organisá torneonan ‘emblematiko’ durante e próksimo kuater añanan ku éksito i, manera ta e kaso ku tur nos akuerdonan komersial, esaki lo permití nos brinda un sosten mas grandi na nos 211 miembronan asosiá”, asina Gianni Infantino, presidente di FIFA, a deklará.

“E akuerdo aki ta kontemplá inovashon, desaroyo i e kreashon di inisiativanan sosial ku tin un impakto na nivel mundial i ta den liña ku e mishon di FIFA pa hasi ku futbòl berdaderamente ta alkansá un nivel global.