OVERIJSSEL—Korte na Overijssel a duna hungadonan rason den dos diferente kaso kaminda nan a pidi nan plaka perdí bèk di kompanianan online.

Ta trata den tur dos kaso di sientos di míles di euro ku a gasta den oktober 2021, e momentu ku e merkardo di azar online a keda legalisá. E konsekuensianan por ta grandi: kompanianan ilegal a gana prome ku legalisashon posiblemente miares na wega di plaka online i e chens ta ku un parti mester keda paga bek na otro klientenan ku tambe bai korte. Esaki ta un logro grandi segun abogado Loonstein ku ta representa e dos hungadonan ku a gana e kaso. Segun huesnan e kompanianan Bwin i Pokerstars no tabatin permit pa ofrese servisionan di wega di plaka den Hulanda i ku esaki e akuerdo entre kompania i hungado tabata ilegal. Den e promé kaso ta trata di un suma di kasi 188.000 euro i den otro kaso 231.000 euro. Huesnan a duna verediktonan similar kaminda hungadónan a haña rason, pero den e kasonan ei e kompanianan no a presentá i no tabatin abogadonan pa bringa e kaso. E biaha aki a bai otro pero hues a pone e opheshonan di kompanianan un banda. Un di e opheshonnan ta ku wega di plaka online ilegal a keda tolera prome ku legalisashon den 2021, pues kompanianan no tabata den violashon. Pero segun hues no tabatin maneho di toleransia, pasobra den e periodo ei outoridat di wega plaka a parti varios but. Abogadonan di Bwin i Poker no por bisa ainda si e kompanianan ta apela e kaso, pasobra mester evalua. Pa Bwin apelashon ta e uniko alternativa.