Willemstad,– Gobièrnu di Kòrsou a emití un komunikado indikando ku bùsnan chikí no por desviá for di ruta pa transportá turista.

Segun e komunikado di Ministerio di VVRP, resientemente, tabatin un kaso den korte i a bin dilanti den medionan di komunikashon ku bùs chikí tambe por transportá turista. Komo aklarashon, Servisio pa Tráfiko i Transporte (UOVV) ta pone na konosementu di komunidat ku konforme nos lei di ‘Transporte Publiko’ un bùs chiki mester transportá tur pasahero (inkluso turista) kontra pago ekstriktamente konforme su ruta. E ruta spesífiko ta indiká den su pèrmit.

Un bùs chiki pues ta mará na su ruta i ta riba e ruta (trayekto) aki e por transportá pasahero di un parada di bùs pa otro. Na un parada di bùs ta pèrmití solamente pa baha òf rekohé pasahero. Un bùs chikí no por transportá pasahero pafó di su ruta durante e orarionan preskribí den lei, esta entre 6or mainta pa 8or di anochi. Tampoko un bùs chikí no por funshoná komo taksi.