Apesar ku tin diferente kampaña pa tene Kòrsou limpi, ainda tin personanan ku ménos bon intenshon ku ta dùmp shushi riba forma regular.

Willemstad, — Nos landfill aktual no ta sostenibel den término largu. Esaki un rapòrt for di 2018 a konkluí.

Alrededor di 95% di shushi na Korsou ta resultá na landfill. Esaki ta segun investigashon ku a wòrdu hasí dor di èks alumno di Haagse Hogeschool. Segun Kirsten Koeiman e maneho di shushi preferí na Kòrsou ta pa dùmp shushi na landfill. Den e sistema di tira sushi afó aki tur shushi ta wòrdu bruhá den otro. Métodonan sostenibel ku por remplasá e método bieu di tira sushi afó ta separashon di shushi, generashon di energia for di shushi, resiklashon, prevenshon òf minimalisashon di shushi.

Resiklahe ta un método kaminda ta uza produktonan di nobo. Den aña 2010 a habri ‘Milieustraat’ na Malpais pa enkurashá habitantenan pa trese produktonan ku no ta wòrdu uza pa resiklá. Na ‘Milieustraat’ por resiklá entre otro bateria, plèstik,, aluminio, tire, elektrónika, glas, metal, heru i tambe produktonan di kolor blanku. Selikor huntu ku otro kompanianan lokal manera Green Force ta enkargá ku prosesamentu di e produktonan ku ta wòrdu resiklá. Seguidamente e produktonan resiklá aki ta wòrdu eksportá dor di e kompania nan lokal pa paisnan eksterior. Green Force por ehempel ta eksportá produktonan resiklá pa paisnan eksterior kaminda e produktonan ta wòrdu transformá den produktonan nobo.

E método sostenibel ménos preferí na Kòrsou ta prevenshon òf minimalisashon di shushi bou di konsumidónan. Den pasado Selikor huntu ku organisashonnan lokal komo por ehèmpel Fundashon Kòrsou Limpi i Bunita a hasi esfuerso pa eduká komunidat tokante di esaki. A duna informashon na skolnan, sentronan di komunidat i otro organisashon nan tokante kon konsumidónan por yuda ku e prevenshon òf minimalisashon di shushi. Tambe diferente programanan pa konsientisá pueblo a wòrdu organisá i sentronan pa dròp off shushi a wòrdu establesé pa sostené e kousa di prevenshon i minimalisashon di shushi.

E esfuersonan aki no tabata eksitoso debí ku e programanan no tabata efektivo i tabata wòrdu ehekutá na un manera inkonsistente. Ademas tabatin un falta di regulashon efektivo ku tampoko no tabata wòrdu ehekutá konsistente pa asina por prevení sushi.  Segun Kirsten Koeiman su rapòrt na 2018, ta difísil pa e maneho di shushi na Kòrsou bira sostenibel si no krea regulashon efektivo i ehekutá esakinan na un manera korekto. Tambe ta rekomendá pa eduká pueblo mas riba tópikonan di konsumimentu i maneho di sushi na un manera sostenibel.