Esaki ta un edifisio ku ta un monumento, si e kambionan ta signifikante na un edifisio, e no por bini na remarke pa bira un monumento.

Willemstad,– Segun minister di VVRP señor  Charles Cooper mirando diferente petishon ku tin pa nombrá edifisionan komo monumento protehá, Servisio pa Planifikashon Urbano (ROP) ta duna informashon tokante kondishonnan pa un edifisio por bini na remarke pa keda nominá komo un monumento protehá. Na momento ku un persona òf un instansia tin e deseo pa hasi un petishon pa gobièrnu nombrá un edifisio komo un monumento protehá, tin diferente aspekto ku mester evaluá.

E kondishonnan aki ta stipulá den diferente lei i reglamentu, manera entre otro ‘Monumenteneilandsverordening Curacao’ (AB 1990, nr 5), ‘Algemene selectie-criteria’ di aña 1992, i ‘Aanwijzing van archeologische beschermde monumenten’ di aña 1995.

Un kondishon primordial ta ku e edifisio tin 50 aña òf mas di eksistensia. E edifisio den su totalidat mester ta di e époka konserní. Kòrsou komo pais a konosé diferente estilo di arkitektura atraves di époka nan. E edifisio pues mester reflehá e estilo arkitektóniko di e époka den kual el a wòrdu konstruí. Tambe tin kondishonnan pa loke ta kambionan manera konstrukshon i/òf rekonstrukshon na e edifisio. Si e kambionan aki tabata signifikante, e edifisio no por bini na remarke.

Tambe gobièrnu ta laga ekspertonan riba e materia hasi estudio riba aspekto arkitektóniko i históriko, pa evaluá si e lokalidat di e edifisio tin balor eksepshonal. Esaki tambe ta un kriterio di selekshon general pa bini na remarke pa un edifisio keda nominá komo monumento protehá.

Ta evaluá tambe e posibilidat si e tereno òf sitio kaminda e edifisio ta situá por bini na remarke komo un monumento arkeológiko. E tereno òf sitio mester tin un evento di impakto direkto históriko. Di e forma aki, ROP a duna en breve algun kondishon importante pa un edifisio keda nombrá komo monumento protehá. Tin edifisio ku por bin na remarke i ta keda nombrá komo tal, i tin otronan ku lamentablemente no ta bini na remarke. ROP ta e instansia gubernamental ku tin profeshonalnan ekipá pa evaluá e tipo di petishonnan aki konforme reglanan vigente.