Eljan: Eljan di Radio Active entrevistando Peguero den nan studio improvisá pa karnaval riba “Rooseveltweg”.

Otrobanda—E kompania produktor di kontenido internashonal pa promové Kòrsou den eksterior, KONTENTU ta sigui eksportá kontenido di Kòrsou pa merkado di turismo internashonal. Na e momentonan aki e kompania riba su propio forsa huntu ku CTB, ta trahando riba merkadonan di Medellin i Republica Dominicana.

Pronto, lo sigui merkadonan di Miami, New York, Amsterdam i Panamá. Ta planiá pa 2023 orientá riba mas merkado latino amerikano i ya kaba den tapara tin algun pais na bista den kuadro di nan koperashon ku CTB. Hóben direktora i kordinadora di e proyekto, Gysha Sulvaran e dianan aki ta kordinando bishita di e periodista reportera ku aktualmente ta kresiendo na Santo Domingo, Irina Peguero.

Peguero ta unu dje presentadónan den e programa mas popular aktualmente den oranan di mèrdia na Santo Domingo, Super Meridiano ku ta pasando den oranan di mèrdia dje pais merenguero. Pequero a yega djaweps atardi Kòrsou i ya kaba e kuminsá hasi su rekorido den kayanan di Kòrsou unda e la hasi diferente reportahe den oranan di anochi, mustrando e ambiente den kaya.

Peguero entre otro a hasi dos reportahe den bario di Wishi Marchena unda el a sinta den seno di e pueblo i hasta a rekonosé e zonido di dominó unda e la hasi un reportahe di esaki tambe. E talento dominikana alabes a pasa na diferente trùk di pan, unda na BBQ Express riba Caracasbaai tambe e la hasi un reportahe riba e tradishon di hóbennan di Kòrsou pa kome na “trùk di pan”.

Durante wikènt lo bini diferente entrevista mas ku e.o. funshonarionan di CTB, representantenan di hotel i di turismo i bishita na radio emisoranan ku ta transmitiendo e evento di karnaval d”den kaya”.