Willemstad,– Ya ta konosí ku bishitantenan for di Venezuela no ta Bon Bini pa bishitá Kòrsou. Esaki por wòrdu konkluí riba e echo ku turistanan for di Venezuela mester risibí un visa pa bishitá Kòrsou.

For di informashon disponibel, Reino Hulandes, inkluso Hulanda, por honra solamente 200 visa pa luna pa bishitante nan for di Venezuela. Pues, solamente 200 persona for di Venezuela por bishitá Hulanda i/òf islanan ABC.

Den pasado turismo for di Venezuela tabata un dje pilarnan den e sektor lokal di turismo. Despues ku frontera a sera, e sektor tabata man na kabes pa asina buska otro paisnan ku lo yena e buraku kreá na momentu ku turismo fo’i Venezuela a bira nulo.

E desishon di Hulanda, pa emití solamente 200 visa mensual for di Venezuela ta un atake frontal kontra di ekonomia, turismo i por venir di Kòrsou. E responsabilidat pa duna e turista venezolano visa pa biaha pa Kòrsou ta responsabilidat di Hulanda. E pais oropeo, tin su fronteranan hanchu habri pa tur sorto i tipo di refugiado kana drenta rònt mundu sin un visa, pero pa Kòrsou risibí un turista for di Venezuela mester di visa.

95 mil turista fo’i Venezuela na 2015 na 1030 turista den 2022

For di sifranan publiká por nota ku for di 2015 turismo for di Venezuela a kuminsá baha riba un forma bastante drástiko. Kaminda na dezèmber 2015 alrededor di 95 mil turista Venezolano a bishitá Kòrsou, na dezèmber 2022 solamente 1030 turista fo’i Venezuela a bishitá nos isla.

Mas aleu datos publiká a prueba ku turista di Venezuela tabata gasta mas tantu ku e turista Hulandes na 2016 pa dia durante nan estadia. Apesar ku e krísis ekonómiko di Venezuela a kuminsá na 2010, e turista di Venezuela tabata gasta 117.95 dòler pa dia na Kòrsou kaminda e turista Hulandes tabata gasta 117.35 dòler pa dia. Pues na 2016 e krísis ekonómiko na Venezuela no tabata afektá gastunan diario di e turista Venezolano ainda.

CTB ta keda neutral

Direktor di ofisina di turismo, Muryad de Bruin a indiká na Vigilante ku CTB ta opiná ku Kòrsou mester keda habrí i aksesibel pa bishita, pero den mesun rosea de Bruin ta splika ku CTB no por buta preshon pa habri Kòrsou. “Tin muchu mas kos ku solamente turismo, entre otro seguridat di frontera, tratado i palabrashon nan internashonal i akinan CTB no por duna un rekomendashon”. Tambe de Bruin a indiká ku turismo for di Repúblika Dominikana tin mesun situashon kaminda turistanan mester tin un visa pa yega Kòrsou, pero CTB no por buta preshon pa eliminá e visanan. 

Mas aleu de Bruin a indiká ku CTB mes ta kai bou di un ministerio ku ta kai bou di gobèrnu, pues lo ta trabou di gobièrnu pa trata na eliminá visa na Venezuela.