WILLEMSTAD – Kontraloria General a investigá e kuentanan anual di Landsloterij pa loke ta trata 2010 pa 2018, pero no por a evaluá si e transakshonnan finansiero ku Landsloterij a hasi durante e añan ei, a sosodé segun regla.

Esaki pa motibu ku Landsloterij no por a demostrá ku el a fiha regla i instrukshon interno ku mester kumpli kuné na momento di hasi kualke transakshon finansiero.

Pa loke ta trata e disposishonnan ku no tin un efekto direkto riba legalidat di e pòstnan riba e kuenta anual, a konstatá ku entre otro ku e akountent no ta konta kaha riba un base regular. Segun e akountent, ta asina debí na un evaluashon di kosto i benefisio. Landsloterij ta indiká ku internamente sí ta konta kaha tur dia. No opstante, Landsloterij no a fiha un prosedimentu interno pa maneho i konteo di kaha.

Landsloterij no ta depositá e surplus di sèn efektivo den kaha na CBCS manera ta preskribí tampoko, pero ta depositá esaki na e bankonan lokal. “Landsloterij no a fiha límite pa e kantidat di efektivo ku tin mag di tene internamente. Ademas, tin un inklaridat na Landsloterij tokante kon e stipulashon riba entrega di surplus di efektivo mester wòrdu apliká den práktika. Pa loke ta trata e instituto finansiero serka kual mester depositá e surplus, e lei ta antikuá.”

Kontraloria no a risibí niun di e kuentanan anual na tempu tampoko serka Landsloterij aprobashon. “Ta te ora ku Kontraloria a pidi e kuentanan akí, Landsloterij a manda nan.” Segun Kontraloria ku eksepshon di aña 2010, Landsloterij no a hasi kontribushon (uitkering) tampoko, siendo ku den mayoria di e añanan, Landsloterij tabatin un resultado finansiero positivo. “Segun Landsloterij, esaki tabata riba òrdu di e minister di e tempu ei, pero Landsloterij no por a proba esaki. Loke sí a hasi den e periodo ei ta vários donashon i patrosinio. Sinembargo, esei no ta duna garantia ku ta kumpli ku meta fihá pa e kontribushonnan.”

Ademas Kontraloria a konstatá ku den e añanan ku a logra un resultado positivo, no a depositá e resultado no repartí riba un kuenta individual ‘Reserve uitkeringen Landsloterij’ na un banko lokal. Pa loke ta trata e fondo di garantia, Landsloterij a kumpli ku loke lei ta bisa. Pero tòg Kontraloria ta di opinion ku, mirá a base di e kuadro hurídiko aktual, e fondo no ta ofresé e kobertura nesesario pa garantisá e premionan i e pakete di prima di e sorteonan spesial.

Kontraloria a konstatá ademas ku ta te na fin di 2018, posishon finansiero di Landsloterij a kuminsá mustra mas sano. Sinembargo, esei tin di aber ku e eliminashon insidental di e debenan di ‘zegelbelasting’ i ‘vergunningsrecht’ ku Landsloterij tin serka Pais. “No por konkluí ku siguransa ku e posishon finansiero a mehorá na un manera struktural, ya ku Landsloterij no por a presentá niun plan konkreto ku ta mustra kon lo hasi e organisashon bira lukrativo, i mirando ku na fin di 2018 ya e organisashon tabatin un resultado finansiero negativo. Pa falta di un plan di ehekushon bon elaborá, no tin sigur ku e mehorashon di e posishon finansiero lo ta struktural. P’esei, ta eksistí e rísiko ku e organisashon lo bolbe hañ’é konfrontá ku resultado negativo i ku, na su turno, esei por hiba na un kapital negativo i problema di kontinuidat.”