Segun sr. de Lannoy, presidente di Raad van Ouderenbeleid mester traha konhunto pa asina atendé ku e asuntu di kuido den komunidat di Kòrsou.

Willemstad, — Defensor di Pueblo i representante di Raad van Ouderenbeleid a indiká ku e protokòlnan pa protehá personanan ku Alzheimer na Kòrsou no ta eksistente.

Sr. de Lannoy presidente di Raad van Ouderenbeleid ku tabata presente na parlamento dia 10 di novèmber a menshoná ku no tin protokòl na nos pais pa protehá personanan ku tin Alzheimer. Ántes kuido di hende grandi tabata privá, pero awor mester bini ku un maneho integral ku ta na fabor di tur hende grandi. Reglanan pa protehá hendenan ku tin demensia ta importante i mester tin tambe protokòl di kuratela. Na Aruba por ehèmpel, un persona ku ta wòrdu aloká bou di kuratela ta wòrdu referí dor di ekspertonan di Geheugenpoli, segun sr. de Lannoy ta splika.

Sr. de Lannoy a indiká ku e protokòlnan di protekshon aki no ta na lugá na pais Kòrsou. Segun de Lannoy su presentashon na parlamento dia 10 di novèmber último, na aña 2018 parlamento di Kòrsou a skibi un karta kual a keda firmá dor di diferente parlamentario ku ta, i ainda ta den gobièrnu. E karta aki tabata pa asina yega na un proseso aselerá pa yega na un maneho integral pa kuido di grandinan, i tambe kontinuá kòntròl di kasnan di hende grandi, i informá parlamento periódikamente di e resultadonan.

Tambe e karta di aña 2018 ta indiká ku ke aselerá un proyekto piloto pa asina yega na un ofisina di konsulta pa grandinan i tambe pa bini ku un maneho pa duna grandinan posibilidat pa partisipá den desaroyo teknológiko. I por último, e karta ta indiká ku a firma pa enkaminá e proseso pa atendé ku e diferente leinan ku ta konserní kasnan di hende grandi, pa asina definí kontròl maneho i ehekushon entre e ministerionan konserní. For di 10-10-10 kuido di hende grandi a keda repartí bou di ministerio GMN, ministerio di SOAW i SVB.

Sr. de Lannoy presidente di Raad van Ouderenbeleid a menshoná ku Raad van Ouderenbeleid tin diferente rapòrtnan di último añanan tantu digital komo hardcopy. Sr. de Lannoy a indiká ku un kompromiso sigur ku ta wòrdu pidí, ta e kolaborashon entre ministerio SOAW i GMN, i ku esaki no ta sosodiendo. Sr. de Lannoy a menshoná ku ta haña ku ta Raad van Ouderenbeleid su tarea si, pa yuda tur otro organisashonnan konserní den kuido pa traha huntu.

Sr. de Lannoy a indiká ku ora puntra esnan konserní ku kuido di hende grandi, si ke traha huntu tur ke, pero esaki lástimamente no ta sosodiendo den práktika na e momentunan aki.