Ajax: Mauricia Productions tabata enkargá ku produkshon di e wega entre Ajax i Selekshon di Kòrsou. E produkshon a bai pa retnan di ESPN International, Ziggo Sports Oropa via di e Southfield.

Brievengat—Durante siman pasá tabatin hopi spekulashon riba produkshon Festival di Tumba 2023. Bastante rumor infundá tabata sirkulando riba produkshon di e festival di músika mas grandi na Kòrsou. Finalmente, e desishon a bin kai i tur fanátiko di Festival di Tumba por keda trankil.

Produkshon di Festival di Tumba pa 2023 ta den man di Mauricia Productions. Ta trata Kompania di un hóben yu di Kòrsou, konsiderá na e momentonan aki komo unu dje mihónan na Kòrsou i kisas hasta region. Raino Mauricia, ta direkto propietario di e kompania i ta bini for di un trayekto intachabel pa lokual ta trata produkshonnan oudio visual. Ta trata di un kompania lokal, bon rekomendá i respetá den e industria di produkshon.

Mauricia Productions ta bini for di un trayektoria sumamente eksitoso i ta konosí pa produkshon di kalidat. Unu di su proyektonan, kual pueblo a sigui hopi di aserka, tabata remodelashon pa produsí ruedanan di prensa pa Gobièrnu di Kòrsou. Mauricia Productions, tabata e kompania enkargá pa re remodelá’ a e sala di konferensha téknikamente pa produsí tur rueda di prensa organisá den sala di prensa na Fòrti Amsterdam. Huntu ku e Departamentu di Komunikashon Estatal, Mauricia Productions a introdusí un modelo nobo den produkshon pa pueblo di Kòrsou por mira, skucha i hasta partisipá mediante ret sosial na e ruedanan di prensa tumando lugá. E impakto di su kambionan a bira mas visibel, durante e periodo di Covid unda míles di siudadano na Kòrsou por a sigui e diskushonnan importante dje pandemia ku ainda ta afektando nos bida diario.

Mauricia Productions, ta un kompania ku hopi kredibilidat i rèspèt den e mundu di produkshon oudio visual. Durante bishita di Ajax na Kòrsou, e kas produktor di kontenido KONTENTU di Kòrsou a kontratá Mauricia Productions pa produsí e wega entre Ajax i Selekshon di Kòrsou. E produkshon di e wega durante bishita di Ajax tabata importante pa Kòrsou, debí ku Ziggo Sports International tabatin tur derechi na Oropa pa transmití e wega. E produkshon mester a tuma lugá mediante kas produktor di ESPN na Hulanda, Southfield. Southfield ta un kompania renombrá ku e.o. ta produsí tur wega di futbòl na Hulanda den Ere Divisie i ta distribuí esaki pa ESPN International. I tabata Mauricia Productions ku mester a produsí e wega na Kòrsou pa ESPN i Ziggo Sports, dos kompania internashonal ku no mester di introdukshon. Aparte di a produsí e wega pa KONTENTU, Mauricia Productions tin hopi aña  ta produsiendo pa diferente otro produktonan lokal i internashonal, inkluso e proyekto internashonal di Tele Medellin ku KONTENTU a trese Kòrsou.

Pa tal motibu, no por spera nada otro sino kalidat haltu pa Festival di Tumba 2023. Konosiendo e kompania lokal, fanatikonan di Tumba por sinta trankil den nan kas i risibi un bon produkshon.  E derechi di e produkshon ta di Asosashon di Músiko kual asosashon lo pone e transmishon disponibel pa retnan di televishon interesá pa kumpra i pas’é pa nan televidentenan.