WILLEMSTAD,-  Kòrsou por bai probechá di un ruta nobo ku e kompania di aviashon Merikano, Jet Blue ta bai habri. Entrante 30 ougùstùs awor Jet Blue ta bula e ruta Schiphol pa New York i Schiphol pa Boston tur dia i ta ofresé alabes konekshon pa entre otro Kòrsou i Aruba.

Jet Blue ta bai bula e rutanan aki  ku un A321 ku 114 stul den “economy class” i 24 stul den “business class”. E avion aki ta mas chikí ku avionnan ku kompanianan kompetidor ta bula kuné. Jet Blue sinembargo ta hasi entre otro uso di su  netwerk grandi den Merka, Latino Amérika i Karibe pa kompetí riba e ruta aki. Konsekuentemente Jet Blue ta ofresé posibilidat pa via e aeropuerto John F. Kennedy subi buelonan di konekshon pa un di su hopi otro destinashonnan inkluso pues Kòrsou, Aruba, Repúblika Dominikana, Puerto Rico i Jamaica.