Willemstad,–  Durante rueda di prensa ayera promé minister di Kòrsou Gilmar ‘Pik’ Pisas a elaborá riba e desaroyonan di Covid na Kòrsou i na mundu.

Promé minister a bisa ku na 2019 a kuminsá e problema aki di Covid na China i na 2020 Kòrsou no tabata eksepshon i 2021 tampoko kaminda nos a pasa den momentunan ferfelu i difísil kaminda hendenan  a fayesé i tambe nos ekonomia a kolèps i hendenan a pèrdè trabou te ku mester a bai over na parti pakete di kuminda i sosten finansiero manera ya ta konosí.

Señor Pisas ta bisa ku ora ku nos a kere ku a sali for di problemátika aki , awor a presentá e vírus nobo ku ta Delta.

E ta bisa ku Hulanda mes ta eksperensiando esaki i for di ora e ta na Hulanda ta kuestion  di sekònde pa e ta na Kòrsou.

Segun Gilmar “Pik” Pisas promé minister di Kòrsou ta bon pa tuma paso for di awor aki relashoná ku e vírùs Delta ku ya ta na Hulanda i ta kuestion di tempu pa  yega Kòrsou, e ta bisa ku esaki no ta nifiká ku ta bini medidanan nobo, pero ta pa fortalesé loke tin kaba.

E ta bisa ku talento nos tin sufisiente, pero pa loke ta disiplina esaki ta loke gobièrnu ta bai enfatisá riba dje pa tene e kontagio nan abou.

Promé minister ta anunsiá ku pa kuminsá entrante djaluna 19 di yüli próksimo Hulanda ta keda kalifiká komo pais di riesgo hopi haltu, pues tur pasahero ku ta bini Kòrsou for di Hulanda mester hasi un PCR tèst 72 ora promé ku su buelo, pues tambe yunan di Kòrsou ku ta na Hulanda i kier bini Kòrsou for di Hulanda, tambe nan lo mester pasa e PCR tèst i tambe e yena e formulario, pues tur esakinan ta keda na vigor.

Tambe Pisas ta splika ku si un persona sali Hulanda i bai un pais di riesgo abou, pero e ta keda ménos ku 14 dia i despues kier bini Kòrsou, e mester kumpli ku e mesun reglanan ku a pone pa esnan ku ta bini for Hulanda.