WILLEMSTAD – Korte den Promé Instansia a dikta sentensia resientemente den un kaso di impuesto entre un pagadó di impuesto i Inspektor di Impuesto.

E desishon ta konsistí di un apelashon dje pagadó di impuesto kontra e suma ku a kobr’é na impuesto di entrada pa e aña 2021. E punto prinsipal di diskushon tabata e altura dje dedukshon di gastunan ekstraordinario debí na gastunan di estudio di un yu estudiante. Despues di evaluá e kaso ku koutela Korte a deklará e opheshon fundá i ademas a redusí e suma di impuesto ku e mama mester paga.

E dama tin un yu hòmber ku a kaba di hasi 25 aña luna pasá. Den e aña dje “aanslag” e tabata inskribí na Hulanda pa studia Economics and Business Economics (un estudio di bachelor) i Accounting, Auditing and Controle (un estudio master), na Erasmus University Rotterdam. E proseso den Korte a kuminsá ku un “aanslag” di un impuesto di entrada ku e mama a risibí riba 24 di mart di aña pasá.

Den esaki a establesé e mama su entrada riba kua por imponé impuesto (“belastbaar inkomen”) na 96.523 florin i un suma di impuesto di entrada di 3.209 florin. E mama a entregá un opheshon kontra e impuesto akí, ku el a entregá riba 14 di mart 2023. Despues di un opheshon parsialmente faborabel, kaminda a redusí e impuesto te na un suma di 1.566 florin, e mama a apelá riba 4 di sèptèmber 2023. Finalmente e mama a bai Korte, ku a trata e kaso dia 29 di febrüari último.

E punto prinsipal di diskushon tabata e dedukshon di gastunan di estudio pa e yu estudiante. E mama a pone e suma di 4.066 florin komo gastunan di estudio di su yu komo dedukshon di gastunan ekstraordinario, di kua un parti tabata konsistí di plaka di skol (“collegegeld”). Sinembargo, Inspektor di Impuesto a alegá ku e gastunan di estudio ekstraordinario no tabata primi riba e mama, pasó su yu por a skohe pa hasi un fiansa pa e plaka di skol, pero a ninga di hasi esaki.

Korte a konsiderá ku por dedusí e gastunan di paga skol i e bukinan komo gastunan di estudio puru, pero solamente sí nan ta preshoná e mama. Apesar ku su yu tabatin e posibilidat pa pidi un krédito pa paga skol, e no a hasi uso di esaki. For di “statement”-nan banko i otro dokumentunan usá komo prueba, ta resultá ku e mama efektivamente a manda suma pa su yu paga skol. P’esei, Korte a husga ku e gastunan di skol bèrdat tabata preshoná e mama, no opstante e posibilidat di fiansa.

Konsekuentemente, Korte a redusí e impuesto, outorisando un dedukshon èkstra di 2.709 florin pa gastunan di estudio di su yu. Korte a establesé e mama su “belastbaar inkomen” na 93.814 florin. Pa finalisá, Korte a determiná ku no tabatin indikashon pa un kompensashon di gastunan di e proseso hudisial, pero Inspektor di Impuesto ta obligá pa paga e gastunan di grefi di 50 florin bèk na e dama. Tantu e dama komo e Inspektor tin e posibilidat pa apelá denter di dos luna kontra e desishon akí na Hòf (sala di impuesto).