BREDA—Korte na Breda a stòp e kaso kontra e dama sospechá di a venená su partner den desèmber 2020.

E dama a fayesé djaluna na Tilburg den su kas. Ayera e dama (64) mester a tende e veredikto den su kaso. Huesnan a tuma desishon despues di un konsulta kortiku ku debí na su morto e proseso ta stòp. OM a pidi e luna aki un kastigu di 19 aña kontra Yvon K pa venena su partner. E víktima tabata doño di supermerkado riku. OM tabata konvensí ku e dama a venena e hòmber pa haña su herensia. Semper Yvon K a ninga esaki. E por a warda e veredikto na kas i djaluna a pone un fin na su bida. Korte a para ketu ayera mainta na e diskushon kiko e veredikto lo tabata. Loke nos ta bai bisa lo yama mas pregunta

. Dikon apsolve, dikon kondena, segun Omroep Brabant a relata di loke hues a bisa. Segun Omroep Brabant e famianan di e víktima doño di supermerkado a reakshoná desepshoná i tristu riba desishon di korte. Nan tabata kier tende un veredikto apesar ku e sospechoso a fayesé. Pa e famia e desishon di korte ta hopi amargo, inhustu i insatisfaktorio. Asina abogado Mark van Raak a bisa na nòmber di e famia ayera den korte di Breda. No mester lubida ku dos luna prome ku e partner a fayesé na 2020, el a kambia su testament pone Yvon K komo úniko heredero. E famia tabata den hopi konsternashon kaba pasobra e sospechoso por a warda e veredikto den libertat. Loke a pasa finalmente ta ku Yvon K a hui di e veredikto. Segun ekspertonan tin algu mas ku ta hunga un ròl, esta si Yvon K no a keda kondená, e herensia ta pasa pa su yu.