WILLEMSTAD – Den un karta dirigí na Minister di Desaroyo Ekonómiko Ruisandro Cijntje, Roderick Rosaria i Indira Boelbaai di Kousa Promé ta denunsiá falta di rèspèt pa e estatua restourá di mr. Dr. Moises Frumencio da Costa Gomez riba Gomezplein den Punda, ya ku gobièrnu a duna 75% dje plasa dediká na dje na komèrsio.

Dia 15 di desèmber último tabatin desvelo di e estatua restourá, ku ta e dia históriko ku a firma Statüt. “Un lei kaminda un di e partisipantenan prinsipal tabata Dòktor Moises Frumencio da Costa Gomez. Netamente di e mesun Dòktor akí a kita 75% di e plasa dediká na dje i entregá na komèrsio. Kousa Promé no tin problema ku desaroyo ekonómiko den sentro di siudat. Kontrali, nos ke mira mas desaroyo spesialmente di yunan di tera den sentro di kapital. Pero no a kosto di baluarte mr. Dr. Moises Frumencio da Costa Gomez. Unda e rèspèt i honor pa e baluarte importante akí a keda? Unda patriotismo a keda den pais Kòrsou? Unda e rekonosementu i balor pa un baluarte nashonal a keda? Unda e rèspèt i balor pa e plasa importante akí a keda?”

Segun Kousa Promé, ekspertonan ta splika ku un plasa ta mará na regla pa e por ta funshonal. Algun di e reglanan ta: espasio kaminda hende por move, agrupá i sosialisá. Kaminda tin sufisiente akomodashon pa hende. “Otro karakterísitko importante ta, ku tin ku tene kuenta ku nifikashon di e plasa, spesialmente pa loke ta trata su historia i e loke e ta para p’e. Plasa Gomez t’ei pa duna homenahe i rekonosementu na e yu di Kòrsou mr. Dr. Moises Frumencio da Costa Gomez. Dòktor tabata presidente di e promé Konseho Gubernamental di Antia. El a pone e promé pasonan pa yega na e outonomia di Antia. El a yuda demokratisá elekshon i habri kaminda pa pueblo kompleto por partisipá na polítika.”

Na 1948 el a logra derecho general di voto pa Antia kompleto. Promé ku esaki ta hulandesnan i komersiantenan pudiente so por a vota i keda eligí pa goberná. E Konseho di Gobernashon di Gomez a saka e prohibishon legal di tambú for di lei di órden públiko aki na Kòrsou. E tabata un polítiko di gran mérito pa Kòrsou. “E estado aktual di Plasa Gomez ta inaseptabel. E plasa a bira pa komèrsio i ta keda awor tras di lomba di e estatua di e gran Gomez. Gomez no ta meresé esaki. Movementu Kousa Promé den kuadro di su filosofía pa yega na identidat i unión nashonal ta boga pa rehabilitá e plasa i poné bèk den su gloria anterior.”

Pa medio di e karta dirigí na Minister Cijntje, Kousa Promé ta pidi pa nulifiká e dekreto ku a sali den pasado kaminda a duna pèrmit pa transformá e sitio den un plasa di komèrsio. “Pa e motibu akí a desviá i bandoná e idea i propósito original. Nos di Kousa Promé ta boga pa rehabilitá Plasa Gomez. Rehabilitando Plasa Gomez ta duna balor berdadero bèk na e baluarte yu-di-Kòrsou Mr. Dr. Moises Frumencio da Costa Gomez. Nos ta spera ku Minister di Desaroyo Ekonómiko tambe tuma un posishon fiho riba e asuntu importante akí i duna un kontribushon pa Dòktor haña un plasa ku e realmente meresé.”

Kousa Promé a manda un kopia di e karta pa Minister di Enseñansa, Kultura, Siensia i Deporte Sithree “Cey” van Heydoorn, Minister di Tráfiko, Transporte i Planifikashon Urbano (VVRP), Parlamento i tambe Fundashon Estatua Mr. Dr. M. F. da Costa Gomez.