AMSTERDAM—Kuater sospechoso a keda detené ku a hasi froude ku nan kompanianan riba gran eskala den negoshi di outonan luhoso.

Dos importadó i dos taxateur ta keda sospechá di falsifikashon di dokumento i froude, segun polis. E kuater detenidonan ta hombernan di 27 pa 39 aña. entretantu nan a keda liberá pa fiskal, pero ta keda sospechoso den e kaso pasobra e investigashon no a finalisá. Segun polis tabatin froude ku outonan importá. E investigashon ta ekspone e sensibilidat di froude ku importashon di outonan i deklarashon di impuesto. Outonan di luho ku balor di katalogo di mas ku 50.000 euro ta keda importá riba gran eskala for di Alemania. Mayoria biaha ta paga e outonan kesh pa despues via kompanianan di outo keda eksportá pa Hulanda. Di e manera aki kriminalnan por kumpra outo sin konosementu di gobièrnu i laba plaka. Seguidamente ta purba ku diferente truko froudulento pa haña benefisio fiskal entre otro ora hasi deklarashon di belasting esaki ta keda kasi na nihil. For di investigashon a resultá ku ta hasi manera e outo tin daño pa paga menos belasting. Importadónan i taxateur ta fasilitá hendenan ku di e manera aki kier laba plaka i purba evadí belasting. Importadónan i tacateur ta traha raportnan falsifiká. E kuater sospechosona a hasi nan mes kulpabel di esaki. E investigashon a keda hasi pa un team di ekspertonan finansiero di reshèrshi di Amsterdam. Durante e dia di aresto a hasi entradanan den regio di Amsterdam i Leiden i a konfiská diferente plachi di number prosedente di robo i invalido. Riba esaki tambe outoridatnan ta hasi investigashon.