DEN HAAG—E lei nobo di Bibienda lo permiti munisipionan pa obliga propietarionan di bende nan kasnan solamente na hendenan ku entrada mediano/abou.

E lei mester garantisá ku e grupo aki tambe tin posibilidat pa kumpra un kas. Ta trata di kasnan na benta te 355.000 euro. Den futuro lo no ta posibel mas pa bende e kasnan aki ku tur hende. Enbes di esaki e munisipio por obligá pa un kas bou di e preis aki bai pa un kumpradó ku entrada mediano/abou. Aktualmente ta hopi difisil pa personanan ku entrada mediano/abou negoshá pa un kas kontra esnan ku mas entrada riba e merkado di bibienda skars. Apesar ku un mayoria den Tweede Kamer ta para tras di e lei, e kambio di lei ta kontroversial. Partidonan di koalishon VVD i D66 ta di opinion ku e lei ta un infrakshon di derechonan di propiedat di e propietarionan. Pronto por sosode ku un kas por wordu bende solamente na un kumpradó ku ta ofrese ménos.

Kiko ta pasa si bo kier bende e kas lihe pa motibu di divorsio, Boulakjar (D66) ta puntra. Bo mester pasa den yen opstakulo na munisipio. Ademas, Konseho di Estado a atverti ku e lei nobo por oumentá presinan di bibienda. Pasobra si bo bende bo kas riba 350.000 euro, bo no mester tene kuenta ku e lei. Minister de Jonge ta kere ku e oumento di preis lo ta rasonabel. Otro defensornan di e lei ta enfatisá ku hendenan ku salario promedio ta keda supera pa personanan ku tin hopi plaka, segun Grinwis (ChristenUnie). Ku esaki e bibiendanan mas barata hopi biaha ta inasesibel pa e grupo aki. E lei nobo ta hasi ofertanan haltu mas difisil. Asina tambe por evita invershonistanan riku. Aktualmente desaroyadonan di proyekto ta kumpra apartamentonan barata i transformá nan den kasnan di hur karisimo. Pero ku e lei aki por evita e desaroyo. Banda di e lei ku lo konta pa kasnan na benta, munisipionan por pone kondishonnan na kasnan nobo i kasnan di hur. Asina profeshonalnan den sierto sektor manera maestronan i agentenan polisial, por haña preferensia.