Punda,– Parlamento den un reunion públiko a tene un debate tokante e leinan nobo penal ku ta pendiente pa wòrdu evaluá dor di parlamento.

Parlamentario Corine Djaoen Genaro a habri e reunion splikando e trayekto pakiko a kuminsá ku e adaptashon nan den nos leinan penal. For di 2019 e proyekto di lei a keda entregá na parlamento pa tratamentu. Mesora den komishon sentral parlamento a kuminsá ku tratamentu di e konseptonan di e leinan, pero debí na Covid-19 ta te na mei 2020, parlamento den komishon sentral a publiká un relato preliminar ku preguntanan pa gobièrnu tokante e adaptashon nan di e leinan penal. Kasi 1 aña despues, gobièrnu a kontestá e preguntanan kual tabata na mart 2021. Na ougùstùs 2021 ora e parlamento nobo a drenta den ofisina, un reunion tripartit a tuma lugá kaminda a resultá ku e parlamentonan di Kòrsou i St Maarten tabata tin mas nesesidat pa aklarashon tokante e leinan aki.

Na febrüari 2023 e komishon di parlamento ku tabata traha riba e leinan aki, tabata tin nesesidat pa mas aklarashon tékiniko. E aklarashon tékniko ta enserá puntonan di bista di otro ekspertonan di leinan penal. Abogadonan ku ku tabata presente tabata abogado Mirto Murray i abogado Paula Janssen.