Staten i Lei impuesto

WILLEMSTAD – Parlamento a ratifiká e konsepto di presupuesto di Parlamento pa 2025, i ademas a aprobá e “Landsverordening bestrijding witwassen, financieren van terrorisme en het finansieren van proliferatie” i “Landsverordening herziening en reparatie belastingverordening 2024”. Ademas a aseptá un moshon pa Parlamentarionan duna kuent’i rason ora ku nan biaha pa eksterior pa trabou.

Despues di a pasa den e dokumentonan ku a drenta i a aprobá nótulonan, Miembronan di Parlamento a ratifiká e konsepto di presupuesto di Parlamento pa 2025. Seguidamente a trata un moshon entregá, ku Parlamento aseptá ku 15 voto na fabor i 1 voto kontra. E base dje moshon ta ku Parlamento den su presupuesto pa aña 2025 tin 600 mil florin reservá pa biahamentu.

I konforme artíkulo 13 dje Ordenansa Sentral ‘Geldelijke Voorzieningen Staten’, nan ta risibí plaka pa hasi e biahe pa eksterior. E kompensashon akí, ta pa paga gastunan relashoná ku e biahenan. Reportahe i relato finansiero, ta hèrmèntnan ku un miembro di Parlamento por usa, pa di forma transparente responsabilisá su mes pa un biahe di trabou. Parlamentarionan mester usa e medionan finansiero risibí na un manera transparente i konforme reglanan i leinan establesé.

P’e motibu ei Parlamento a disidí ku kada momentu ku Parlamentarionan realisá biahenan pagá pa Parlamento, mester presentá reportahe i relato finansiero despues ku nan regresá for di eksterior. Grefi ta atministrá e fondonan konforme artíkulo 13 number 4 dje Ordenansa Sentral ‘Geldelijke Voorzieningen Staten’ i raportá na Parlamento.

I finalmente Parlamento ta kuminsá kana e kaminda pa riba término kòrtiku trese kambionan nesesario den e Ordenansa Sentral ‘Geldelijke Voorzieningen Staten’. E moshon tabata unu di Michelangelo “Lo” Martines di frakshon KEM, ku sosten di Parlamentarionan Quincy Girigorie ku ademas ta lider di partido PAR, Giselle Mc William ku ademas ta lider di partido MAN, Gilbert “Gibi” Doran di MFK i Parlamentario independiente Zita Jesus-Leito. Girigorie mes ni Steven Martina di MAN, no tabata presente den sala pa vota. I e úniko ku a vota kontra ta miembro di Parlamento pa frakshon di TPK, Rennox Calmes. Parlamentarionan Elvin Gerard i Corrine Djaoen-Genaro tampoko a vota.

Despues e Parlamentarionan a haña e oportunidat pa hasi pregunta na Minister di Finansa, Javier Silvania relashoná ku e “Landsverordening bestrijding witwassen, financieren van terrorisme en het finansieren van proliferatie”. Minister Silvania a kontestá e preguntanan. I finalmente a kontinuá ku e “Landsverordening herziening en reparatie belastingverordening 2024”. Riba e tema akí tambe miembronan di Parlamento a hasi pregunta na e Silvania, ku na su turno a kontestá e preguntanan akí tambe. Parlamento a aprobá tur 2 konsepto di lei.