Señora Lidewijde Ongering

Willemstad – Konseho di Minister di Reino i tambe Konseho di Minister di Hulanda, pa loke ta trata Hulanda Karibense, a nombra drs. Lidewijde Ongering komo presidente nobo di e tres Kolegionan di supervishon finansiero entrante 1 di febrüari 2023. Di e manera aki e ta sigui prof. dr. Raymond Gradus, kende tabata presidente di e Kolegionan for di 1 di yüli 2017.

Djabièrnè 27 di yanüari 2023 a nombra señora Lidewijde Ongering presidente nobo di e tres Kolegionan di supervishon finansiero entrante 1 di febrüari 2023. E tin un trayektoria ekstenso den un gran kantidat di departamentu na Den Haag, entre otro na esnan di Asuntunan Interno i Relashon den Reino, Infrastruktura i Maneho di Awa, i Asuntonan Ekonómiko i Klima. Den e delaster dos departamentonan aki el a ehersé e funshon di Sekretario General. Durante su karera den Ministerio di Salú Públiko, Bienestar i Deporte el a ehersé e funshon di Direktor di Asuntunan Finansiero i Ekonómiko.

Lidewijde Ongering: “Mi ta buska pa nos enfrentá huntu e retonan, ku por sierto pa un gran parti ta masha rekonosibel pa mi, for di un perspektiva konhunto. Cft ta supervisá e presupuestonan. Despues di algun aña finansieramente difísil, awor e enfoke ta riba rekuperashon i realisashon di un kresementu ekonómiko na un manera finansieramente responsabel i sostenibel. Den mi funshon nobo di presidente di Cft lo mi bai wak e asuntunan aki tambe di un manera masha serio.”

E ta sigui Raymond Gradus, kende tabata Presidente di Kolegio di supervishon finansiero di Kòrsou i Sint Maarten, di Kolegio di supervishon finansiero di Aruba i di Kolegio di supervishon finansiero di Boneiru, Sint Eustatius i Saba durante mas di sinku aña i mei. Prof. Gradus ta mira atras riba un periodo intensivo i fruktífero di kooperashon ku e paisnan i ku e entidatnan públiko, ku a pasa den diferente reto grandi, manera e orkannan Irma i Maria i e pandemia di Covid-19. Raymond Gradus a hinka su reflekshonnan den forma di un buki i 31 di yanüari e lo presentá esaski na Vice-Presidente di Konseho di Estado, señor Thom de Graaf.