Minister Cijntje i su tim dunando splikashon tokante dokumentashon nesesario.

Willemstad, — Dia 25 di òktober último MEO, huntu ku brantwer, i KPC a duna un rueda di prensa tokante di kòntròl den sektor di horeca.

Minister Cijntje a menshoná ku di parti MEO ta duna pèrmitnan na negoshinan den e sektor aki i tambe ta envolví ku otro ministerionan i disiplina ku tin outoridat riba nan mes pa hasi kòntròl riba esakinan. Konhunto ta bini huntu den e team multi-disiplinario pa asina informá komunidat.  Minister Cijntje a menshoná ku e rueda di prensa ta pasombra tin basta preokupashon, ya komo kasi 61 porshento di lokalidatnan no ta kumpli ku pèrmitnan. Minister Cijntje ta menshoná ku e intenshon no ta pa stroba desaroyo ekonómiko i ke stimulá esaki.  Minister Cijntje  a menshona ku e idea di e rueda di prensa ta pa transferensha total.

Bosero di Inspekshon ekonómiko a menshoná ku ta sali i kontrolá pa asina wak si e kargadó di pèrmit ta kumpli ku regla. Pa kontrolá, ta bai na e lokashon pa wak si ta kumpli ku e pèrmit. E pèrmit ta kosta alrededor di 1200 florin. Ta chèk ku tin pèrmit, inskripshon na kvk, vestigingsvergunning, i tambe horecavegunning. Na momentu ku e empresario no tin esakinan ta para operashon. Representante di Inspekshon ekonómiko, ta menshoná ku tin kasonan den kual personanan ta laga sierto dokumento na kas, pero ta duna e persona espasio pa asina e persona por buska su dokumentonan i despues presentá esaki.

Bosero di KPC, Maurits Rosalina, a menshoná ku KPC tin e propio outoridat pa hasi kòntròl na momentu ku ta trata órden públiko, siguridat, pero tambe trankilidat den komunidat. Ta duna konseho na  minister di Hustisia i MEO, na momentu ku tin ku entrega pèrmit na e empresario. Bosero di KPC, a menshoná ku ta wak entre otro si e persona aki ta registrá den korte, òf si e a wòrdu kondená pa un òf otro kaso penal. Tambe ta investigá unda e lokashon ta ubiká, i tambe si e lokalidat por bini na remarke pa músika, i tambe kon leu ta kumpli ku instrukshon den kuadro di órden di públiko den kuadro di trankilidat i siguridat. Ta duna konseho na e ministerionan pa kual esakinan al final, ta disidí si ta duna pèrmit si òf no.

Rosalina, a agregá tambe ku na momento ku kontrolá ta wak si e vergunning ta visibel den e lokalidat. Representante di KPC  ta menshoná ku ta komprondé ku kisas tin kargadó di pèrmit, ku ta laga nan dokumento na kas pa asina evitá ku den un situashon di kiebro, ta hòrta esaki i bai kuné. Pero, representante di KPC ta menshoná ku kargadó di pèrmit ta keda responsabel pa tin esaki na momentu ku hasi kòntròl i ku esaki mester ta visibel pa outoridatnan. Tambe ta menshoná ku ta prohibí pa tin menor di edat di 18 aña den e lokalidatnan. Sirbimentu di kòntròl na menor di edat tambe ta prohibí. E kargadó di e vergunning ta keda responsabilisá pa e aktonan di personanan na e lokalidat.  Tambe representante di KPC a menshoná, ku ta konstatá ku lokalidatnan tin mashinan pa hunga plaka i esaki tambe ta prohibí.

Bosero di Brantwer a menshoná ku brantwer tambe a tuma parti den diferente kontròlnan. E bosero a menshoná ku den e kontròl ta wak e punto nan krusial di kandela. Ta wak e indeling di e lokalidat, por ehèmpel kon e kushina ta, i si esaki ta habrí. Bosero di Brantwer a menshoná ku e kushina mester ta un kushina kompletamente riba su kurpa. Ta wak murayanan, porta, instalashon di gas pa den dado kaso si tin kandela. Bosero di Brantwer ta menshoná ku e instalashon di gas mester wòrdu instalá dor di personanan sertifiká pa hasi esaki. Mester tin un kranchi di gas tambe di mínimo 6 liter. Tin diferente tipo di kranchi di gas i mester tene kuenta ku esakinan mester ta di kùr. Bosero di Brantwer a menshoná ku e afzuigkap tambe ta algu ku mester wòrdu limpia konstantemente.

Minister Cijntje a menshoná ku mester tin rapòrtnan ku ta wòrdu traha, den kual tin konsekuensianan mara na dje. E lei ‘Vergunninglandsverordering’  ta hopi bieu pero e medida di trèk in pèrmit ta un medida hopi drástiko i esaki lo ta bai ta e maneho. Ta pa e motibu aki ta tene e reda di prensa, pa tin mas transparensia i informá promé ku tuma e medinanan. Durante lunanan ta wòrdu avisá i despues di dos luna di avishon ta trèk in pèrmit. 

Hurista di MEO a menshoná si ku e lei di ‘Vergunningslandsverordening’ ta di 1963 i ku esaki no tin sanshon mara na dje. Hurista a menshoná ku tin un lei di horeca ku ta kla si pa asina remplasá e lei bieu. Hurista di MEO ta menshoná ku e lei nobo mester remplasá e lei bieu kompletu i mester wòrdu modernisá pero esaki lo tuma su tempu. Minister Cijntje a menshoná ku e parti higiéniko den horeca tambe ta un aspekto ku mester tene kuenta kuné. Minister cijntje ta menshoná ku keho di produkto ta  e parti ku GMN ta hasi pa wak si nan no ta dañino. Representante di team multisdisiplinario a menshoná ku GMN tin rapòrtnan traha den kuadro di preguntanan relashoná ku kuminda.