Warda: Eric de Vries ta warda awe wak kon leu Count ta yega.

Bullenbaai—Mañan djamars 5 desèmber ta último dia pa Count Energy por paga 28 mion florin bira doño di e fuel oil kontrabanda den tankinan na Bullenbaai. Abogado enkargá ku e destaho Eric de Vries no tabata kier bai den detaye di e situashon. Mi no por bai den esaki pero asina mi por duna mas informashon lo mi laga bo sa”, e la duna di konosé na Vigilante djabièrnè último.

Count Energy a bira un kandidato despues ku e kompania I&E Petroleum no por a yega na kumpli ku e pagonan despues di e destaho riba 1 di novèmber último. E problema mas grandi pa kumpli ku e pago ta e “compliance” na bankonan, debí na e kontrabanda di e fuel oil. Tabata den Sèptèmber 2022, ku Refineria di Kòrsou a anunsiá nan promé aktividat petrolero despues di 2018, unda a laga e fuel oil drenta tankinan na Bullenbbaai.

Pero despues e fuel oil a okashoná hopi problema entre e sosionan ku a trese e produkto pero tambe prensa internashonal a kuestioná e transakshon. A bin resultá ku e kompania panameño ku a laga trese e fuel oil, United Petroleo Corporation tabatin dos direktor venezolano kendenan a hòrta mas ku mei bion dòler na produkto for di PDVSA. Tabata saka e produktonan sin pèrmit for di Venezuela. PDVSA despues a hasi keho unda a ámbos direktor a keda enkarselá,  akusá di froude kontra di estado.

Despues ku e kompania United Petroleo a bia bankarota, te awe niun kompania no por claim propiedat di e fuel oil pasobra simplemente ta fuel oil hòrtá for di PDVSA. RdK, tabata den negligensha komersial dor di no a verifiká dokumentashonnan original di e zeta. Konsekuentemte benta di e produkto tambe a bira un problema. Miéntras e produkto a keda den tankinan na Bullenbaai te awe, for di febrüari mart 2023 a start un problema entre e sosionan ku tin derechi pa manehá Bullenbaai.

Caribbean Petroleum Refinery, kual kompania a risibi aprobashon pa firma un HOA ku Rdk, a plama for di otro. YDK, Erchenel Doran a saka su sosionan venezolano for di e kompania prinsipal i pasa tur akshon den un kompania nobo Birux. Birux, huntu ku un otro kompania panameño, KNOB Trading a kuminsá hasi trámitenan pa apoderá di e fuel oil, pero atrobe bankonan korespondiente, no tabata konfia e produkto den tankinan na Bullenbaai.

Bullenbaai a keda sin sèn di hür, pero ku e fuel oil den su tankinan, ku na preis di merkado ta kalkulá di ta por lo ménos 25 mion dòler. RdK a aserka abogado de Vries pa inisiá un proseso si destaho pa e por haña su sèn atras di hür, ku for di febrüari 2023 no tabata drenta mas. 1 di novèmber, a tene e promé destaho, pero e kompania ku a gana no tabata por a finalisá pago. E di dos kompania ku a bid mas haltu, Count Energy a risibi derechi riba esaki. Pero awor Count tambe mester a pasa den e proseso di verifikashon na banko riba e produkto. No ta konosí si esei a logra pero, abogado Eric De Vries a duna e kompania Count Energy deadline te ku 5 di desèmber próksimo pa paga 28 mion florin pa 490 bari di fuel oil. Manera publiká den Vigilante, si Count Energy no logra e pago promé ku 5 di desèmber riba 6 di desèmber siguiente dia, ta bin un destaho. Esei ta nifiká ku e kostonan di e destaho ta bai riba nòmber di Count Energy. Esaki ta lokual por konkluí for di un korespondensha prosedente di abogado de Vries, relashoná ku e problema riba e pagonan retrasá. Esaki ta di dos biaha ku no ta logrando e suma subi kuenta di dùrwarder. Pero den e kaso aki, Count Energy tin te ku mañan. Si Count Energy Trading S.A., no yega na paga e sèn, sekshon 469 (5) riba kondishonnan di e destaho ta drenta na vigor, kual lo nifiká básikamente un “bidding” kompletamente nobo bou di kostonan di esun kende no a kumpli.