Willemstad—-Pa motibu di varios petishon pa simplifiká i hasi e prosedura pa importá produktonan pa remedinan alternativo i suplementonan mas efisiente, Minister di Salú Públiko, Medio Ambiente i Naturalesa a pidi Inspekshon di Salú Públiko pa huntu ku un grupo di trabou investigá e posibilidatnan pa simplifiká e prosedura aki.

A base di e deliberashonnan ku a sali for di esaki Inspekshon di Remedinan a simplifiká e maneho pa importashon i atmishon di remedinan alternativo i suplementonan.

E simplifikashon aki ta denter di e kuadro di maneho eksistente i no tin konsekuensia pa e kalidat di e produktonan i tampoko ta afektá e maneho i kontrol di Inspekshon di Remedinan riba e produktonan aki.

Den pasado tabata nesesario pa na momentu di kada importashon pa pidi outorisashon na Inspekshon di Remedinan (pa medio di un stèmpel), i despues mester a entregá e dokumentonan nesesario, inkluyendo pèrmit di Inspekshon di Remedinan, na Duana. Ku introdukshon di e Maneho nobo di Inspekshon e prosedura a wòrdu simplifiká. Pa medio di e maneho aki importadónan por pidi outorisashon adelantá na Inspekshon di Remedinan pa importashon di remedinan alternativo i suplementonan. E outorisashon kontinuo por eskrito akí (bálido pa un aña) ta konsistí di un lista di tur e remedinan alternativo ku ta e importadó en kuestion ta importá durante di e aña ei. Ku e outorisashon ei e importadónan tin e derecho pa importá e produktonan ku tin riba nan lista, sin ku kada biaha, na momentu di importashon, nan mester bai pidi outorisashon na Inspekshon di Remedinan. Minister di Salú Públiko a risibí e maneho nobo aki i ta spera ku e maneho aki ta perkurá pa mehorashon di e eksperensia di importadónan.