NIEUWE HAVEN—Djabièrnè siman pasá, Korte Penal den promé Instansha mester a bolbe trata un kaso mas di keho falsu riba aktonan inmoral. Ta di dos biaha den un siman, ku tabatin kasonan similar kual a trata unu siman pasá miéntras un otro ainda mester keda trat’a.

E hòmber di fam V, a kai será pòrnada riba deklarashon di un damita di 16 aña, kende a gana su mama ku V lo a mishi ku su partinan íntimo. Durante tratamentu riba djabièrnè último, fiskal di Ministerio Públiko mr. Dennaoui mes a súplika Korte di Promé Instansha pa duna V su libertat. Ministerio Públiko tabatin asina tantu kompashon, ku riba e atardi mes, e fiskal a sinta traha e karta mesora pa V por a bai kas bek, kende por sierto tin un kantidat di 11 yu pa atendé kuné riba Dia di Tata.

Korte i Ministerio Públiko pareu a bin duda den deklarashonnan di e víktima, pasobra e deklarashonnan di tantu e mama komo e “tata di kriansa” nan deklarashon tabata kuadra kasi kompletamente. Korte a skucha nan separá djabièrnè último i a keda asombrá ku ámbos nan deklarashon tabata kuadra. E konfiansa a bin krese mas tantu na momento ku un kachó ku ta protehá e víktima, riba e anochi en kestion no a reakshoná. Manera publiká djabièrnè último, un kachó Chiwawa krusá no sa laga niun hende yega serka di e damita ku e deklará ku pareha di su mama a mishi kuné. Riba e anochi di e sospechonan e kachó tabata drumi normal serka e damita riba kama. Korte ta konkluí, atraves di deklarashonnan ku riba e anochi e kachó no a reakshoná i no blaf tampoko, dunando sosten na deklarashon di V ku tabata imposibel ku e por a kometé niun aklto inmoral riba e damita

Siman pasá tabatin un otro kaso mas, unda tin sospecho e biaha aki ku e mama mes a krea un deklarashon falsu riba un tata biológiko. E tata ta wardando hopi largu pa Ministerio Públiko por trese e kaso dilanti, pasobra debí na e keho e no por wak su yu. E kaso ta pendiente tratamentu.