Akusá: kapitannan di Go Fastnan ta uzando argumento riba awanan teritorial pa “gèmbel” riba nan kaso den korte.

Nieuwe Haven—Por lo ménos 15 Narkotrafikante venezolano ta akusando Warda Kosta di ta drenta nan awanan unda nan no tin outoridat pa interseptá. E akusashonnan ta andando for di Yüni 2023 pero djarason último datonan nobo ta lanta preguntanan si en bèrdat e akusashon di e narko-nan ta bálido.

For di Yüni 2023, prinsipalmente despues di 24 di Yüni tabatin un seri serio di akusashon kontra di Warda Kosta despues ku riba 23 i 24 di Yuni e barku di Marina Real,  Zr.Ms. Groningen  a interseptá dos Go Fast kargando 2 mil kilo di droga, inkluso kokaina i mariwana. En prinsipio no tabatin nada partikular den e interseptashonnan pero ta trata di 12 venezolano, repartí den un grupo di 7 i un otro grupo di 5.

Ámbos grupo insistentemente a deklará riba nan duda abase di nan GPS ku ta kontradiktorio na lokual Warda Kosta a indiká. Djabièrnè último a bini mas desaroyo ku Fiskal di Ministerio Públiko mr. Hara tampoko no por a duna un kontesta. E kordinatonan indiká pa Warda Kosta no por a aklara korte miéntras tin sospechoso bastante konkreto ku hasta unu di e Go Fastnan a disparsé foi radar.

E otro grupo di venezolano tambe a kanta “foul play” di parti di Warda Kosta pasobra momento e botonan di Warda Kosta a yega nan tabata apénas 7 mia for di kosta venezolano. Segun nan deklarashon, nan destino no tabata Kòrsou i na momento e fregata di Marina a interseptá nan lancha, ainda nan tabata mira e lusnan na kosta di Venezuela.  Ta trata di e hòmbernan, tur nase na Venezuela, Jose Pacheco, Adrian Delcine, Xavier Delcine, Javier Guillen Lopez, Jose Rodriquez, Neomal Cedeno, Wreyner i Urbina Sovil. Riba 24 di Yüni e fregata di warda kosta a nota e hòmbernan riba un lancha unda a interseptá nan nabegashon. Durante investigashon a bin resultá ku tabata trata di un nabegashon narkotráfiko, pero segun e venezolanonan nan no tabata den awanan internashonal sino ainda nabegando den laman venezolano, apenas 7 mia. Un otro grupo di 5, Damni Gabriel Mata Salazar 1990 Venezuela, Jose Alexander Salazar Louis 1988 Venezuela, Fransisc Javier Solo Trillo, Juan Antonio Salazar Carrion 1959 Venezuela i Diogenes Ramon Lugo Arias 1958 Venezuela tambe ta deklará mesun kos. Pero nan deklarashon ta mas fuerte si kompara e GPS den nan kaso. Korte a posponé tratamentu di nan kaso pa buska mihó informashon riba e GPS i konsulta eksperto.

Durante un otro kaso, abogadonan defensor a mustra den korte, kon un Go Fast tabata nabega banda di e unidat FRISC di Warda Kosta, unda e kapitan tabata mustra riba su GPS indikando ku nan ta den laman di Venezuela. Segun Warda Kosta, nan tabata den laman internashonal pa interseptá un Go-Fast ku tabata karga alrededor di 1600 kilo di kokaina. Despues ku warda kosta a logra stòp e motornan di e Go-Fast, un warda kosta Merikano lo a tira e kapitan dje Go-Fast den su kara. Mesora e hòmber a muri debí na su herida.  E hòmbernan ku a sobrebibí tambe a bisa Korte di tabata den awanan di Venezuela. Echo ta ku e hòmbernan a trata na transportá un lote grandi di kokaina i pa esaki e hòmbernan mester risibí un kondena. Korte a dikta ku kada akusado lo mester sinta un kastigu inkodishonal di 8 aña. Ta trata di Derwin Hernandez Garcia, Jesus Gonzalez Gomez, Jean Paul Placencia Salazar i Luingi Malave Vargas tur ta risibí un kastigu di 8 aña.