Hopi: CTB a invitá hopi influente riba retnan sosial pa promové Kòrsou.

PUNDA—Mas ku 150 influentenan riba ret sosial a yega Kòrsou pa promoshon. Esaki ta un proyekto kordiná pa Ofisina di Turismo na Kòrsou, CTB.

Alrededor di 150 personahe influyente riba retnan sosial a yega Kòrsou. E bishita ta resultado di bastante efuerso i biahenan pa paisnan latino amerikano. Segun Hugo Clarinda di CTB, e personahenan lo bishita diferente parti di Kòrsou unda via di nan plataforma nan ta promové Kòrsou pa e merkado brasilero. Ehekutivo enkargá ku e merkado latino amerikano, Andre Rojer tambe ta bastante entusiasmá ku e bishita den kuadro pa promoshon di Kòrsou na Brazil. Algun siman pasá Kòrsou a hiba un bishita ministerial e pais pa orientashon. Durante su bishita di trabou na Brazil, Minister di Desaroyo Ekonómiko a palabrá ku embahador di Reino Andre Driessen ku lo bai traha ku outoridatnan di Brazil, pa kita Kòrsou for di ‘blacklist’, ya ku esaki ta perhudiká sektor di turismo.

Tambe a palabrá ku Kònsùl General di Reino ku ta buska un aserkamentu na Gobièrnu di Rio pa un Memorandum of Understanding (MOU) di koperashon riba tereno kultural i komersial kaminda sektor kreativo lo tin un ròl prominente. “Ya kaba tin músikonan i artistanan di Kòrsou ta kousa estrago na Brazil. Brazil komo un pais grandi, ta keda aserká na nivel di siudat pa nos komo isla chikí por atendé mas mihó. Un MOU asin’aki ta bai duna nos posibilidat di haña mas i mihó informashon tokante e impakto ekonómiko i komersial.

Un otro punto importante ta e liña aéreo “Azul. Nan a start  nan buelonan ku vários forma inovativo manera ‘Handelskade’ di prent riba un di nan avionnan. E buelo pa Kòrsou aki, ta promé bia ku Azul ta bula pa un destinashon den Karibe.