WILLEMSTAD,—-“Speransa” ta un komposishon di Maudiènne Espoza, miéntras e areglo musikal a keda den man di Ito Martis. Ta trata aki di un piesa ku ta den e género di gòspel, den kual género musikal, e kantante menshoná ta aktivo.

T’asina ku e piesa ku ta hiba di titulo, “Speransa”, ta halando bastante atenshon i ta hañando hopi reakshon ariba media sosial i prinsipalmente na Aruba, Boneiru i Kòrsou. Tambe e ta zona na diferente radio-emisora lokal. E piesa sigur ta un motivashon den e momentunan difísil, ku práktikamente mundu kompletu ta pasando aden.

Maudiènne Espoza ta un kantante yu di Kòrsou, pero ku ta bibando ya tres aña kaba na Boneiru. Ta trata aki di kantante, kende ta forma parti ketu bai di e organisashon musikal ku ta karga di nòmber “T.R.U.E.”

Últimamente Maudiènne ta kompositá su propio piesanan komo artista solista.

Su promé piesa ku e la komponé i ku el a lansa, ta titulá “Su bista ta riba bo”. Esaki a sali for di aña pasá na luna di desèmber. Ta trata di un tremendo piesa di enkurashamentu.

Pues sigur Maudiènne Espoza no ta sinta ketu i kada dia di nobo e ta krese mas ku su propio komposishonnan den género di gòspel.