WILLEMSTAD,—-E preparashonnan pa e konsierto pa dia di mama,”Mama pa Semper” ta kanando bon. E aña aki Dibo-D i Randal Corsen lo tin nan di seis edishon di e konsierto pa dia di mama, ku lo tuma lugá riba ‘Octagon Plaza di Avila Beach Hotèl’ djadumingu awor.

Manera e edishonnan anterior e show lo konsistí di bon músika i harimentu. For di e promé edishon ku a tuma lugá na aña 2018,e show a proba di ta unu eksitoso. Semper por a konta ku un plasa yená ku hende disfrutando di Dibo-D i Randal ku nan invitadonan. Te asta den e dos añanan ku pa motibu di e pandemia no tabata posibel pa hasi konsierto bibu dilanti públiko, Dibo-D i Randal Corsen a sòru di trese edishonnan virtual pa tur e mamanan i nan famianan por a disfrutá di e show for di nan kas maske ku ‘shelter in place’ tabata na vigor den e temporada ei.

Aña pasá a disidí tuma un break, debí na e hecho ku Randal tabata di gira den eksterior, i ku trabounan di renobashon na Avila Beach Hotel a buta ku Octagon Plaza no tabata disponibel. Pero e aña aki “Mama pa Semper”, ta bèk riba esenario, i mirando kon e karchinan ta bayendo, por konkluí ku aña pasá e show a hasi falta, i ku pueblo ta kontentu ku Dibo-D i Randal ta bèk e aña aki ku e di seis edishon. Pero manera Dibo-D i Randal mes ta bisa durante nan  show tur hende ta VIP!’,pues ta un sekshon so lo tin riba Octagon Plaza. 

E aña aki e show por konta ku artistanan invitá manera Tony Shearman, RAEY, Tania Kross i su Music is Love choir, i tambe e front kompletu di Doble R Puru, ku lo konsistí di Gibi, Marlon, Nolba, Ñaño i Richinel. Nan tur lo wòrdu kompañá pa un banda ku lo konsistí di 15 di e mihó músikonan di Kòrsou. Banda di tur esaki, e imitashonnan di Dibo-D a bira parti figo di e show. Hendenan ku ta ansioso pa sa ken Dibo-D lo imitá durante e partinan humorístiko e aña aki, lo mester kumpra nan karchi lihé promé ku nan kaba. Tin karchi optenibel ainda na Mensing’s Caminada, 24 Uur Uit De Muur, òf por kumpra online via caribbeanticketshop.com 

Pa tur hende ku ta biba den eksterior, tin posibilidat di sigui e show via Cariflix tambe: por download e ‘app di Cariflix’, i paga pa mira e show sea live òf riba e dianan siguiente. Pero esaki ta posibel solamente pa tur hende bibá den eksterior. Na Kòrsou lo no tin transmishon di Mama pa Semper, pues e úniko opshon ta, buska bo karchi i bai Avila Beach Hotèl djadumingu awor. Porta lo habri 6or di atardi, show ta kuminsá 7or en punto.