Parlamentario Giselle Mc William

WILLEMSTAD – Parlamentario Giselle Mc William ku ta ademas lider di MAN resientemente a manda un karta pa Presidente di Parlamento Charetti America-Francisca rekòrdand’e riba un karta di oposishon di dia 23 di febrüari último ku e petishon pa un reunion públiko riba e karta pa eskoho di ‘preferred bidder’ pa opershon di refineria. E ke pa yama e reunion pa kaba.

“Konsiderando ku e tópiko akí ta unu di sumo di importansia ta importante pa Parlamento pone su mes na altura dje desaroyonan rondó di e proseso, i deliberá ku gobièrnu kiko ta e pasonan ku gobièrnu lo bai tuma pa garantisá ku nos lo haña un operador pa operashon di refineria.” Mc William porlotantu a hasi un apelashon un biaha mas na America-Francisca pa konvoká e reunion akí mas pronto ku ta posibel, p’asina Parlamento por haña klaridat riba e proseso ku ta kanando pa yega na un operadó pa refineria.

Kofirmantenan dje karta ta Rennox Calmes di TPK, Quincy Girigorie di PAR i Michelangelo Martines di KEM. Nan a indiká den nan petishon na Presidente di Parlamento di a tuma nota dje kontenido di e karta ku representante di Grupo GIK a manda pa Ministernan di gabinete Pisas 2. GIK ta un djesnan interesá den operá refineria Isla, ku a lansa akusashon fuerte kontra gobièrnu, tachando integridat dje proseso di eskoho pa un operadó di refineria. Pa e motibu akí e Parlamentarionan ke un reunion urgente ku Minister di Asuntunan General (AZ) Gilmar Pisas.

Den e karta GIK ta akusá dos Minister di gabinete Pisas 2, ku probablemente a influensiá e proseso di tal forma ku no a skohe GIK komo e asina yamá ‘preffered bidder’. E karta ta bisa: “Manera ya henter komunidat di Kòrsou sa, e proseso pa yega na un operadó nobo pa e refineria i e terminal di Bullenbaai ku e gobièrnu aktual for di kuminsamentu tabata embolbí den dje, ta karga hopi kontraversia públiko. De fakto, e hunta di komisario di RdK a aprobá GIK komo e preffered bidder. Esaki a tuma lugá pasó GIK tabata e úbliko partido ku a kalifiká pa keda selekshoná. E di dos motibu ta pasó e proposishon di GIK tabata superior. Seguidamente Promé Minister i Minister Charles Cooper, huntu a konvensé Konseho di Minister pa saka GIK afó komo preffered bidder i hinka un grupo ku no a presentá ni prueba di fondo ni prueba di krudo. Komo parti di e desishon akí, Promé Minister i Charles Cooper a organisá un AVA pa duna e falta di rèspèt pa e posishon di e Hunta di Komisario un base hurídiko.”

Segun e Parlamentarionan esaki sigur ta un akusashon fuerte kontra gobièrnu i ta tacha integridat di e proseso di eskoho pa un operadó di refineria. Pa e operashon di refineria ta di gran importansia kaminda ta eksigí profeshonalismo, integridat i sinseridat di parti gobièrnu. “Nos komo miembronan di Parlamento no por sinta ketu, mira i aseptá ku akusashon asina ta bini dilanti i di e forma akí ta tacha e proseso, pero tambe kara i integridat di gobernashon di nos pais.” Nan a supliká e Presidente di Parlamento pa mas pronto posibel konvoká e reunion, pa di e forma akí Parlamento i pueblo di Kòrsou por haña informashon konkreto i korekto enkuanto di e proseso di refineria hibá, i ku a kulminá den eskoho di Caribbean Petroleum Refinery (CPR) komo ‘preffered bidder’.