Gerensia di MCB i Sambil i algun kolega.

Willemstad – MCB ku plaser ta anunsiá apertura di un filial na Sambil durante e di dos mitar di aña 2024. E filial nobo aki lo mehorá e eksperensia di klientenan signifikantemente i lo remplasá e filial na Sta. Maria ku lo sera permanentemente ora e lokalidat di Sambil habri.

Nos ta komprometé na un servisio sin interupshon i kumbiniensia pa nos klientenan durante e transishon pa e lokalidat nobo aki. Na Sambil nos klientenan por spera un lokalidat komfortabel i aksesibel, bastante lugá di parker i tur nos produkto i ofertanan di servisio. Karakterístikanan prinsipal di e filial nobo lo inkluí un mashin di Bankomatiko/ATM ku kapasidatnan mehorá pa kliente depositá i nos komersiantenan por hasi uso di nos Servisio di Depósito 24/7.

Sr. Chicu Capriles, Presidente i CEO di Maduro & Curiel’s Bank, a komentá: “Nos ta entusiasmá pa trese un eksperensia bankario modèrno na nos klientenan ku e apertura di nos filial nobo na Sambil. E paso aki ta parti di nos vishon di sigui brinda servisio ekstraordinario komo tambe ofresé kumbiniensia pa nos klientenan i pa nan nesesidatnan ku ta sigui kambia ku tempu. Nos lo keda komuniká ku nos klientenan tokante e apertura di nos filial nobo na Sambil i klousura di nos filial na Sta. Maria”. El a kontinuá indikando ku “Nos Banko ta keda komprometé na inovashon, satisfakshon di nos klientenan i fortifiká nos presensia pa sirbí nos klientenan mihó na diferente sitionan ku nos ta ubiká.”

Gerensia di Sambil, Sr. Jonathan Cohen, tambe ta entusiasmá tokante e partnership aki: “Nos ta hopi entusiasmá ku MCB ta keda pone enfoke riba modernisashon i kumbiniensia pa klientenan. MCB ta sigui mehorá e eksperensia bankario total pa klientenan personal i komersial i nos ta kontentu ku e mall di Sambil ta parti di e proseso aki.”

E potrètnan ta mustra e momentu ku gerensia di e dos instansianan ta firma e kòntrakt pa MCB habri un filial na Sambil.