Willemstad, Kòrsou – Djaweps 5 di òktober 2023, na edifisio PWFC, Maduro & Curiel’s Bank ku orguyo a lansa su proyekto di arte ‘E Chispa Di Ekspreshon’ ku ta bai duna lus na arte durante e próksimo 3 añanan.

Arte ta un pilar vital den desaroyo di e mucha i hóben. E ta duna nan chèns pa ekspresá i eksperensiá algu positivo. Arte ta parti di e DNA di MCB. Pa hopi aña kaba MCB ta aportá na diferente proyekto ku ta  promové ekspreshon i desaroyo pa medio di arte. Tambe por mira hopi kolekshon di arte den kada un di e edifisionan di MCB. Komo un lider finansiero den nos sosiedat i teniendo na kuenta nos responsabilidat sosial, ta importante pa nos sigui enfoká riba aspektonan ku ta regardá medio ambiente, aspektonan sosial komo tambe nos maneho (ESG). Den e kolaborashon aki ku artistanan lokal nos ta dal un stap grandi pa sigui sigurá e importansia di arte den nos komunidat.

E Chispa di Ekspreshon ta un proyekto ku un durashon di 3 aña, den kua diferente artista lokal lo guia nos muchanan i pone atenshon na e siguiente kategorianan di arte: kanto, baile, teater, arte visual, músika i arte di resiklahe. Esaki lo tuma lugá pa medio di tayernan pa despues profundisá riba e diferente áreanan aki.

MCB ta kontribuí na duna nos mucha i hóbennan e oportunidat pa desaroyá nan kreatividat, stimulá nan ekspreshon personal i fomentá nan habilidatnan di komunikashon. Pa medio di e proyekto aki Maduro & Curiel’s Bank ta habri nan kaminda pa un mundu di oportunidat i posibilidatnan infinito.