WILLEMSTAD – Diferente stakeholders di Gobièrnu a bini huntu pa tuma desishon tokante medidanan riba término largu, a konsekuensia di e kalor ekstremo ku ta persistí na Kòrsou. E proposishonnan lo mester sòru pa un enfoke preventivo mas kla i direkto pa ku salú públiko.

Servisio Meteorológiko di Kòrsou a emití durante di e lastu lunanan un kantidat di mensahe di prekoushon bou di kódigo hel relashoná ku e kalor ekstremo. Aktualmente, diferente organisashon ta reakshoná a base di nan mes perspektiva riba e notifikashonnan di kalor. Espektativa ta ku e situashon di wer lo keda asin’akí. E kalor ademas por intensivá durante e añanan benidero.

Kalor ekstremo por forma un peliger pa nos salú públiko i ta di sumo importansia ku un i tur sa kon tin ku atendé esaki. Temperatura haltu, kombiná ku un grado haltu di humedat, por guia na malesanan relashoná ku kalor ku por ta un menasa si nan no keda tratá korektamente ( por ehèmpel agotamentu pa motibu di kalor i ‘zonnesteek’).

Komo reakshon riba e mensahe di prekoushon pa ku e kalor ekstremo, Ministerio di Salú, Medio Ambiente i Naturalesa ta urgi pa hasi uso di e siguiente tepnan pa yuda ku e temperatura haltu:

• Bebe hopi awa
• Bisti paña lòs for di kurpa, fofo i koló kla
• Evitá kontakto direkto ku rayonan di solo i hasi uso di krema kontra solo ku protekshon haltu
• Keda kaminda ta posibel den sombra
• Bai trankil ora ta anda pafó
• Plania aktividatnan fisíko den oranan di mainta òf anochi ora ku ta un poko mas fresku, i tuma pousa regularmente

Gobièrnu ke enfatisá ku kalor esktremo por toka tur hende, pero prinsipalmente e ta trese un riesgo mas grandi pa hende di edat mas avansá, mucha chikítu, personanan ku kondishonnan médiko i esnan ku ta traha pafó di kas òf hasi deporte den aire liber. Ta esensial pa tuma e medidanan di prekoushon akí na serio i sigui e indikashonnan.

Ekspertonan ta keda monitoriá e situashon di wer i duna update. Via di e website di Gobièrnu, i e diferente retnan sosial di Servisio Meteorológiko di Kòrsou, por sigui e último informashonnan