Isla—Kòrsou mester ta debidamente prekupá ku intenshonnan di Estádos Unídos, pa bolbe imponé sanshon riba Venezuela. Segun e kanal di notisia mas grandi na Estádos Unídos, CBS, kual notisia a pasa tambe via CBS Miami, durante wikènt gobièrnu estado unidense tin intenshon pa imponé sanshon riba e gobièrnu di Nicolas Maduro.

Esaki mester ta un debido prekupashon pa Kòrsou. Direktor di Refineria di Kòrsou, Patrick Newton, a duna di konosé den medionan di komunikashon ku no tin motibu di prekupá. Pero den pasado tambe e direktor di e kompania estatal a deklará ku tabatin lisensia OFAC pa e fuel oil den tankinan na Bullenbaai, lokual no a resultá di tabata bèrdat. Te ku awe, no por logra bende e fuel oil kontrabanda na Bullenbaai okashonando hopi daño ekonómiko na e isla.

Segun CBS Miami, djabièrnè último, Gobièrnu di Estádos Unídos ta bai revisá nan desishon resien pa suavisá sanshonnan imponé riba Venezuela, pero tambe lo hasta trata na imponé sanshonnan nobo. E desishon di revishon ta nifiká ku e akuerdo entre PDVSA i Refineria di Kòrsou tambe ta keda eksponé na riesgo, mirando kon leu por bini kambio den ehekushon di lisensianan OFAC. Manera ta konosí, e desishon pa revishon a bini despues ku Gobièrnu di Venezuela a opta pa blòkia kandidatura di Maria Corina Machado komo opshon den elekshonnan presidenshal. Esaki ta lokual Associated Press a anunsiá. Restrikshon bek riba eksportashon di produktonan petrolero ta nifiká ku Estádos Unídos no ta bai permití Kòrsou importá krudo òf produktonan petrolero for di Venezuela.  Apesar ku mas di 30 pais a protesta riba e desishon na Venezuela, Gobièrnu Estádos Unidense no a duna un posishon fiho ainda, anke ta konosí ku e Gobièrnu di Biden a duna di konosé pa Venezuela mantené su mes den Maneho Polítiko Responsabel pa protehá i instituí demokrasia den e pais. Matty Miller, bosero di Departamento di Estádos a konfirmá ku nan gobièrnu ta bai revisá e maneho riba sanshonnan imponé, lokual por nifiká eliminashon di e suavishon. Si Estádos Unídos eliminá e suavisashon, Kòrsou su negoshi ku Venezuela ta den problema

Durante un seremonia ofishal ku a tuma lugá den e edifisio na Pletterijweg na Kòrsou, CEO di RdK sr. Patrick Newton, Vicepresidente de Exploración y Producción de PDVSA y Presidente de la Corporación Venezolana de Petróleo (CVP) sr. Luis Enrique Molina Duque i Ministro del Poder Popular de Pétroleo y Presidente de Petróleos de Venezuela, S.A. (PDVSA), sr. Pedro Rafael Tellechea Ruiz bou di supervishon di Minister Presidènt di Kòrsou sr. Gilmar Pisas, a firma e Settlement Agreement. Den desèmber 2021, bou di guia di direkto di RdK sr. Patrick Newton, a inisiá e inisiativa pa ekstendé un proposishon di kolaborashon pa asina yega na un akuerdo. Direktor di RdK Patrick Newton a splika ku e ta deseá pa Refineria di Kòrsou bai bek na unda e tabata kontribuí na por lo ménos 10% di e Produkto Nashonal Brutu di Kòrsou. Manera menshoná e akuerdo ta obligá PDVSA di manda 45 mion dòler anual na produkto durante 10 aña. Finalmente, pa promé biaha e direktor a atmití ku e biaha aki si e lisensia di OFAC no ta un problema.